Shishilembaba mapang

Covid-19 tashidak memenateptsü atema shishilembadak nisungtem menungtepdaktsütsü asoshi asenok alidak town shia nung dokan lapokba mapang ya akhidang nungi kanga agia mapang tatsüba kümer lapokdaktsüba ajanga nisungtem menungtepi shishitsü ta bilemba yabo ano khen jungjunga bilemdangshitsü nüngdaker, kechiyong town nung anogo shia mapang tatsütsü dang dokan lapokba ajanga nisungtem shishilembadak taliang nungtepba angur. Ibayongji, nisungtem menungtepi ayongayonga shishitsü atemabo akhi ama anogo piyong dokan lapok nung dang jungdisü ta bilemba agi, taoba hopta nung asenok rongnung ‘Covid-19 tashidak wara aliyonga, asen lima nung dokan lapokba mapang ya akhi ama anepdang anüdok mapang nungi nikongdang anülu tashi lapok nunga koma süla ?” ta asüba tasüngdangba onük nung shisalemsatepogo. Aji oda, iba olemsabang nung shilem agirtemia shishilembadak dokantem ya anogo piyong lapokang tajungba asütsü ta asüba tangatetba nung shisalemsatepba asenoki nguogo. Atangji, alima nung ozüng ya tenük tapok ta tashitemetetertemi ashir saka ozüng tenük apokbaji nübortem tia memetet ser ozüng mashimashi latetba agi masü saka ozüngji ajak atema kasasa, anungji takar sensaker, tulur tilar tejak mereprangi tenük amur ozüngji amshir aser tenük amur, kechi shitak aser kechi ochi yangji obendang agütsür ta asüba agi ozüngji tenük tapok ta jembir. Ajisüaka, kodang asenoki koba ama ozüng aser telemtetba ajanga nübortem ajangzüktsü ta mebilemdangi aser masadangi tenük amur ozüng yangludir, iba jagibo nübortemang akoksatsü. Atangji, Covid-19 tashidak pokteter külen nübortem rongnung menatepa maotsü atema shishilembadak shibangba aser shishilembadak dokan lapoktsü mapang ajema latettsüba ya asen lima nung dang masü saka alima ajak nung benshiba ozüng ka lir. Ajisüaka, tanga lima nung benshiba ajak asenoki junga mebilemdangi benshira, iba jagi asenokang akoksatsü. Tashidak kanga sashia ayimsünga aodang shishilembadak kenyongi melapok shibanga ayubajibo, nübortem timtem aser takoksa ajuruaka, tim dang lir, kechiyong iba jagi tashidak menatepa aotsüba lendong nungi kümzüktsü. Ajisüaka, tang yabo nübortem rongnung rongrongshishi aser mangatettep adoktsü amai tensa mejungi akümdang curfew agütsüba amai masü, nisung menungtepdaktsütsü aser majurutepdaktsütsü atema agütsüba curfew mapang lir. Aji oda, tensa tapu anaji bendangteta asenoki curfew mapang ya amshira nübortemi Covid-19 wara indang ya ano tali tajungba angatettsü. Asenok rongnung shisalemsatepertemi ashiba ama, Covid-19 tashidak ya hopta nung anogo tena-tena marur aser anepbongi mesüra aonung dang arur ta a masü, anungji anogo tiyong ka agiteta dokan lapokdaktsüba telemtetba nungji nübortem tashidak nungi balaka kümzüka alitsüsabo tangatetba ka mengutetter. Atangji, nisung kangabo menungtepdaktsüi ayongayonga shishitsü atema tanga tesemtem nung ama, Kohima aser Dimapur yimtitem nunga gari number kobasa ana agi alemtsü akoker (even numbers) aser kobasa ana agi alemtsü makoker (odd numbers) item garitemji anogo balala nung senzüdaktsüba agibo shishilembadak gari aser nisungtem kanga ajemba angur. Iba amaji tanü ama nübortem lendong nungi kümzüktsü asoshi telemtetba agidang, kechi koma inyakyim agiang nübortem lendongi maitsü aser rongsen tsütsüa makoksatsü ta bilema telemtetba agitsübaji kanga tongtibang kümogo. Tang yabo anogo nung shishitsü mapang tatsüka agütsüba agi tajangzük masü saka lenmang ana nung nübortem takoksa angur. Kaji shishilembadak nisungtem nungtepba agi memeteti tashidak menatsü ana nung lir aser ano kaji dokan amenertem kanga akoksadagi. Asenok telemtetba agirtem aser talirtemibo dokan amenertem akoksaba ya shishia magitsüa akok, saka loktiliba nung mapa meinyak nokdangba ajanga kar akoksabaji ajak akoksar amai bilemtsüla. Itemji ano khen jungjunga bilemdanger, tashidaka menatepa maotsü aser shishilembartema makoksatsü ta asütsüsa telemtetba agirtemi telemtetba agishidaktsüner.