Shishilembaba tsütsü rara ajanga shinga majangzüktsü: Xi

Port Moresby, Yimpoksüi/November 17 (Agencies): China tir Xi Jinping-i, shishilembaba tsütsü raraba ajanga shinga tajangzük mangutsü, ta shia World Trade Organization-i anir linük ajaki inyakyim ka sülen anidaktsü ayongzük.
“Shishilembaba tsütsü tesendaktep raksaba aser tariffs tem benokba ya tangatetba tai aser iba ajanga tamakok dang bener arutsü,” ta Küptoknü Papua New Guinea nung Asia-Pacific Economic Cooperation CEO summit akaba mapang Xi-i ashi. Pei ajungdang asaba aser pei kümzüka ayutsü merangba ajanga alima tejakleni aoba amokbanga ayur aser shishilembaba tsütsü tenokdangba agütsüba policy ajanga kechi südir süaka tamakok dang bener arutsü,” ta paisa ashi.
US aser China na tsüngda tang shishilembaba tsütsü mangatettep adoka lir aser kasa mapang nung US vice-president Mike Pence-i Küptoknü ashiba agi, China-i parnok inyakyim memelenshi tashi Trump administration-i atsü anem makatsü. US-i tang tashi nung China nunger oset belener aruba nung tarrifs USD billion 250 benoka lir aser kasaji China-ia USD billion 110 benoka lir.
“Mangatettep ajak kati ka den ashishitepa bentettsüla. Pei mulungba tangar nem inyakdaktsütsü merangba amala inyakyim agintsüla. Alima puti otsü ajanga cold war, hot war mesera trade war ajanga shinga majangzükba sayuogo,” ta Xi-i Port Moresby nung forum dang ashi.
Pence-i ojembiba mapang Indo-Pacific atema US-i bendanga agüja inyaktsü mulungtter aliba tang tashi taitba lir. Paisa China indang Belt aser Road Initiative aija tang terenlokdak aliba linüktem infrastructure funding ajanga sentsüh atsüba aitsüogo.
“United States-i maongka tajungba agütsür, Onoki onok den longjemer alirtem sentsüh agi metsübangdaktsür,” ta paisa ashi.
Xi-isa sentepa aliba nüburtem dang Papua New Guinea shirnok nem Beijing-i teyari agütsür, parnoki alima rara tanabuba nung shilem tulu agiogo.
“Nisungertem ano lenmang tatentep ka tongogo. Asenoki koba lenmang shimtsü? Teka amteper inyaktsüba aser kati ka anema inyaktsü? Linük ajak aser tarutsü tia asenoki shimba dak keta lir,” ta Xi-i ashi.