Shishilembar dang sen meshiba aitsür: MTLT

Dimapur, April 23 (TYO): Mokokchung jila nung Naga Political Group (NPG) kati shishilembartem dang sen meshia züluba osang angashia kanga aoksar ta Mokokchung Town Lanur Telongjem (MTLT)-i metetdaktsü.
Mokokchung Chamber of Commerce and Industries (MCCI)-i Naga yimten teloki meshiba sen magütsütsü ta telemtetba agiba nung MTLT-ia posema nungiter.
Mokokchung nung shishilembaba maparen ya tila ka dang lir aser item shishilembar dang nungi sen lakh 10 meshibaji magizüker ta MTLT-isa ashi.
Talisa Mokokchung jila nung shishilembartemi kin mesüra telok telemsa kecha melii jila renlokba mapa nung aser loktiliba asoshi shilem tajung agia arur. Anungji, Naga yimten telok kati tawa sen meshi züluba shidiji Mokokchung jila rongsenkettsüng ainba nung tetsükdaktsü bentsür aruba ka ama züngshir.
Shishilembartem ya jila nung senso tajungtem lir aser parnok amokmerenba ajanga tensa mejungi akümtsü akok. Anungji, district administration aser police dang jila nung sensotem timtemdaktsüba osangtem metetpelatsü aser azüoktsü ayongzüker, ta MTLT-isa metetdaktsü.