Shishilempartem den ajungshitep aser sarasademba sentong agi

Dimapur, Monupii / May 31 (TYO):  ABAM Sesquicentennial matong tashi May 31 koba “World no tobacco day” lir iba den külemi ABAM “Temesepba chiyungtsü mamshitsü ajungshiba anogo” amongtsü lemteter ABAM Social Concern ajanga küm shia 2016 nungi mapa balala inyaka arutar. Kasa sentong asoshi taküm (2019) Lim arogotem asoshi tetuytuba agütsübatem rongnungi “Shishilembartem” asoshi sarasadem aser tajungshiba sentong amala akokertemi agitsü osang agütsüba nung ajemdaker ABAM Social Concerni ayonga Impur area nung aliba yimtsüngtem nung shishilembartem asoshi ajungshitepba sentong ka Süngratsü Baptist Arogo nung May 31, 2019 anogo anepdang 6:00 ako nungi – 7:00 ako tashi agi. Ajak agi arogo asem nungi shishilembartem 34 arua iba sentong nung aden, ta ABAM Executive Secretary, Rev. Dr. Mar Atsongchanger-i sangdong ka ajanga metetdaktsü.
Iba sentong nung Rev. Dr. Mar Atsongchanger Executive Secretary, ABAM ajanga shishilempartem dang, nenok yimtsüng nung kanga tongtipang telok ka lir kechiaser lokti nüngdakbatem ajak nenoki timtim jenti ajangshia anganür, anungji nisung shiai ni ya kanga tongtipang nisung ka ta angateta nü libaliru aser inyakyim ajak nung meraküt taküm asütsü nüngdaker, ta ajungshi. Maneni paisa, asenok kechi koma junga mesüra mejungi liaka asenokya “Khristan” kaka asünung anogoshi shishilempa tenzükdang asen teyanglur Tsüngrem den sensak asemtsü tamatok aser Pai moatsüba nungi Pa shilem aibelen mesüi agütsütsü tamatok, ya ashi. Tongtipang ka shisembaji asen Mungdang tenzükba mapang 1897 telemtetba agiba rongnung “kaini” majitsü telemtetba ya ka lir; tia makai asenok iba ama temesepba chiyungtsü ajanga asen Aortem lanu tain jenti samaogo aser ano mekümdangra ano jenti samatsü ana nung lir. Iba telemtetba shitak inyaktsü asoshi nenok dak tashi tulu ka lir, anungji tangatetba nung Tsüngrem aküm tsüboa yamala temesepba chiyungtsü mamshitsü kanga nüngdak, ta ajungshi.
Tatem nung A. Shin 30: 7 & 8 “ Ne dang nungi ni oset ana mepishir; ni masü dang, nai itemji kü dang nungi tesongtema. Kü dak nungi teyazü aser tai talangi ageinang; kü nem sensak tia mesüra rongsena tagütsü…” nung ajemdaker, Tsüngrem tsüngdang ochishia nü dak nungi teyazü talanga ageina shishilempang ta ajungshia Aor shishilempartem ajak asoshi sarasadem agia sentong tempang.
ABAM ajanga asen Aortem shishilempar ajak ochishia asen lima kümzüka ayutsü nükla nung shishilempadang Tsüngremer temaotsü agüjang ta sarasadem ayur aser Süngratsü Baptist arogo aser Social Concern Committee dang iba sentong nung achaayangba asoshi pelaba lemsaer, ta sangdong nung shia lir.