Shitak inyaktsüba mapang

Asen tetsü taso lima nung asenoki meteta aser memeteti mapa kata shitak meinyaktettsüsa asenoki asenoksasa inyakyim (system) ajak raksar mapang talangka lia aruogo. Iba jagi joko mapa shitak inyaktsübajiang tai amai bilemer aser tai inyakbajiang shitak amai bilemer. Aji oda, Nagaland nung kechi bill südir süaka tiyazü bill yanglur sen agizüka agir. Aji oda, arogo maparen nung dena aieni mao nung orr ama, chi mechiyong nung chiyonger ama, oset mali nung alir ama tiyazü bill yanglur sen agizüka agiba alitsü. Iba kasaji government mapa inyakertemi inyaker aser iba kasaji business aser contract inyakertemia inyaker. Itemji dang masü ano nübortemi mapa meinyak ser nung inyaker ama bill yanglur lemaa agir. Item ajakji asenoki asenoksasa ashioktsüba mapatem lir. Iba ama inyakba nung asenok ajaki meteta meshitak inyakba mapa ka tatishitsü amshidi asübo, District shia nung District Planning & Development Board ajanga senotsü amshia inyakba mapatem ya asütsü. Iba board ya district ka kübok constituency aser sub-division nung nübortem nüngdakba reprangteta inyaktsü asoshi tentetba tongtibang sentong yanglua inyaktsü pur telok ka lir. Iba amaji tesem balala nung nübortem nüngdak reprangteta terenlok mapa inyaktsü asoshi sentong yanglua senotsü lemzüktsür. Ajisüaka, alijak nungbo DPDB ajanga inyakba terenlok mapatem kangabo mangur. Ibaji sentong yanglurtemi achiba agi masü saka nübortemi mapa meinyak ser angati sen lema agitsü bilemba ajanga lir. Aji oda, mapa mashika tenüng nung bill yanglur sen agizüka agir. Iba jagi senbo endoker saka alimabo merenloker. Iba amaji asenoki tiyazü project yanglur sen agizüka agibajiang shitak inyaker amai bilemer. Iba amaji meshitak agi shitak küma aser ochimashi agi ochi amato kümdakja inyaka arur joko mapang talangka arur asünungji asenok asoshi mapai mao sen agizüka agiba, mapa meinyak sen agizüka agiba aser tangar tenüng nung teyari miimzüka agiba mapatem ajak ya sarasadema inyaker aser item meshitak mapatem nungi aruba senotsüji temoatsü ama kümdaktsür Tsüngrem tenüng sanga tenla agütsür. Angati anguba sen tenla agütsür asünungji aika tenlar, anungji arogobo takar akümer, ajisüaka inyakerang chiyongang ta ashiba Tsüngremiang asenoki mapa meinyaki anguba sen tenla abenbaji agizüktsü asü magizüktsü ta bilemer. Aji oda, mapa meinyaki tiyazü bill yanglur anguba rongsen agi mesüba chirnurtem ya kechi akümtsü (?) aser meinyaki anguba rongsen agi yangluba kiojen ya kechi akümtsü (?) ta asenok ajaki shisabolua bilemtsüba mapang ka aruogo. Tanü Nagaland nung dang masü saka India ajunga nung iba ama ochimashi mapa inyakba agi alima merenloktetba timtem lir, anungji ibaji reprangteta center government-i , talisa, yimtak yimtsüngtem nung lenmangtem yangluba mapatem ya teinyakdak nunga Delhi nungi anünglen nungi Geo-satellite ajanga reprangtsü tenzükogo. Iba inyakyim ya ajanga mapa teinyakdak nunga koma inyaker aji angutsü, anungji mapa meinyak ser tiyazü bill yanglua magizüktettsü. Ibaji dang masü joko maparen ajak nung computer nung pei meyong nemer dang inyaktsü, anungji nisung kati tangar melena kecha meinyaktettsü.  Joko asenok küm aika senbo chima saka mapa inyakba mongbo kecha mali ta sentsü nung küm atemba timtemji tiyazü agi shitak küma inyakba timtem liasü. Tanü asenok tia ajung, ochi meshinüyonga ochi ashitsüsa aser shitak meinyaknüyonga inyaktsüsa putu tajung aser tasen kati aitadokogo. Iba ama putu nung asenoka pei akok tajungtiba inyaka asen lima renlokdaktsütsübaji Tsüngrem aser nübortemi mulungba asütsü. Joko, meshitak agi shitak küma inyakba aser ochimashi agi ochi ama inyakba sobaliba tamajung toktsür asenoka akok tashi ochishia alitsüsa putu tensai akanger. Lanu putu asoshi teimla aser temoatsü tultutibaji aji asütsü.