Shitak jembitsü shitak zülutsü

~ P. Renthy Jamir.

Kodang English oshi angazüka azüngtsü zülutsü tenzüker tamasa Grammar (Orrlem) sayur. Orrlem tetezü ozüng ka tetuyuba nung ajemdaker oshi shitak jembitsü zülutsü. Aor Chongliyimti lima nungi jembia aruba oshi zülu makayonga tetezü maka tapi agi jembia maru. Ano ken tapu balala Nok ken, Nüknarar ken, Ilangtsür ken yamala ajak ya tetezü taruk/taret (Poetic language) nung Sangru ama atener. Item ken ya Chongli oshia masü Mongsen oshia masü. Ano ken kar kar nungbo Chongli Mongsen oshi ana külemi meyokteper atenbatema lir.
Tang yangi shinübaji tangari jembiba angashir ya junger ta bilemer oshi tetezü telung tashi lua mangateti osang kaket nung züluba ojang kar jangjashitsür. Ya mela mela rajemtsü tatalokba tatishitsü ka bena arudi. Pastor kati tenla kidang tiyatsü (olong) bena arua jembir ta sür “Sotzüa meyongshi yar-a majishi” ta ashi. Joko mena alir tantsür tambur ajak akamatu mokuoka ayu. Kechiyong iba tiyatsü ya yimjak nung mejembir. Aor Shin O ka nung Nashia nashia napok ta jembir onsara tali bendenloka asaknüdang shitakba tetezü to tai agi melentoker.
Yamala temelenshiba nung metokmeperi aliba kar yangi zulur.
1. Shityshir, Kaketshir – Aki mapang tsüraburtemi Skul tanur ta asüba melena Shityshir tasa aja. Iba sülen joko Shityshir melena Kaketshir ta asenoki aja aser ya shitak ratetba ta bilemer. Class A nungi B.A, M.A tashi parnok kaket azüngba reju nung alir. Saka ano tanü asüng kari Shisashir ta jembir. Aser Shisashir ta Ao oshi nung ajabaji o kanga taret. Mashi-i Skul tanur ajak dang kodasür Shisashir ta ajatsü ta bilemer. Kaketshir ta ajatsüla.
2. Mulungmachi, Mulungmasü – Ano nisung kari mulungmachi aser mulungmasü ana ya mebendangi amshir. Mulungmachir, mulungmasür ana ya tetezü kenyongi balala. Mulungmachi ta süra jashia bilem, mulungmasü süra tenük mesülok. Mulung achi kanga pela agizük, pela-a bilem. Mulung asü tenük sülok tebilemba atong.
3. Opaono, Ojapaja – Tongtibangsa yangi opaono ya nisung aikati tetezü tai rateter. Opaono ya o tilateri mejimeno ka ama amshir aji ratet tai, opaono ta süra o tilateri ta masü saka osang tongtibang ka tera peta angashi. Shitak asütsüa akok tai asütsüa akok. Aoksa-a ka Narola o Temjenba na yakta satitsü ta opaono ka angashi. Ojapaja ta süra talila süngsang sanga oa jembiba. Kecha aiben bulua ojapaja ta jembia moi aji tatem süang.
4. Kangasa pelar (Acknowledgement) – Tetsü tebu sür Asükur kangasa pelar ta osang kaket nung zuluba ya tera memotong. Anungji Mulungnen o ta Mulungachiba o ta zulubaji kanga tapet ta bilemer. Tamalena iba ya züluogo. Aikati shitak amshia zuluba angur.
5. Menungra bilemteter – Sur küm kwi jungdir ojang saka menungra bilemteter ta süra amar aliba bilemteterang mesük. Anungji menungrar ta mamateter ta zulutsüla, amatsü makoker.
6. Odang – Nisung aikati o jembiba ajak nung odang odang ta yongna malem enoker aji tetezü makaba o. Ao oshi nung odang ta oda ta yamala ya o taret masü. Lai Yohan 3:16 nung Kechiyong Tsüngremi alima oda meim nung ta zulu. English nung “So love” ta lir. Iba ratet ya asenoki kecha meinyak saka angadi meimba nung rateta zülu südi. Saka o ya tera labi anungji Tsüngremi alima kanga meim nung ta mesüra onsara meim nung ta ratet taretba süla ta bilemer.
7. Obendangdak, Okadak – Ana ya kasa amai saka literal meaningbo balala. Court- The place where lawyer meet/who decide law case, Indian Supreme Court, High Court, District & Sessions Courts ano Courts of Civil Judges & Courts of Magistrates ta aika lemsa-a lir. Ao oshi takar asünung Court nüngja ana obendangdak, okadak. Aser shitakbaji okadak. Obendanger senteper tai temeden saoka jembiba bendangtetsüa akok mebendangtetsüa akok. Saka obendangdak ta süra bendangtettsüla. Aser court nung aiben o bendang magütsüteter. Ken N0. 340 nung asenok obendangdak nokdaktsü ta atener aji shitak züluogo. Kechiyong Tsüngremibo teti ochi obendang agütsür. Mebendangtet ta taipur metentsü ta lai nung mali. Anungji court nüngja ana ya Lai aser ken nung obendangdak ta alima ken o bendangba court dang okadak (bendangtet mebendangtet kecha masü) ta amshitsüla. Iba lima nungbo Kotak Tenyar tuluba Mikaelia o bendang magatsüteti Tsüngrem nem nungloktsü. Yihuda 1:9.
8. Shisangren, Shitetren (Identity) – Yangi Shitetren ta amshitsü. Nai ni shiteter ma? Azüi tobou shiteta meteter. Aener den shitettep. Nai ni Shisanger ma? Ta mejembir aener den shisangtep ta mejembir. O tamajungren kar nungbo par kinunger ya tera tali shisanger ta jembir. Itemi anaben asemben zülur kechiyong tazüngertemi memelenshir.
9. Lili, Wawamenü – Tir Yimyim nung Lili ta amshiba ya wawamenü lir. Lili ta süra tanur ana/aika yimdong nung kima kidang aritepa melangtepa tsüngtepa asatepa kazüba dang ajar, parnok dang telili ta atendanger. Wawamenü süra tain tanur mashi menteper asayatepa tsümotsüra menütepba aika asütsüa akok katiang atongtsüa akok.
10. KUMREM PELAR – Osang kaket nung iba o züngshi, yangi o tetezü tai ta aitsür masü, ano iba ya tanü asüng puratetba o tasen-a masü saka ibai yamala tongtibang nung amshiba o masü. Ya tetsür tanur o onsara tilateri nung kanga junger ta asaya menü o jembiba, Nübangso ama Likokrümen ama posa aon (shi ango masü) iba ama ordinary chiyungtsü tetsür o tetsür na tsütatepdang kümrem junger kümremshirem junger, mangmetsüka junger ta tetsür temi jembir ano negative nungbo mesomeyatsüka majung Atimechia majung ta jembir. Anungji osang kaket nungbo kanga pelar ta ano taretba nungbo onsara pelar ta zuluba tapetba taretba asütsü. Aser aji shitak jembia shitak zülutsü tazünger tejembir ajak ayongzüker.