Shitakba electoral roll

Asenok ajaki Nagaland nung taruba election-bo timi aser kanga merüka aginür, anungji agitettsü ta imlar. Iba taginübaji ataloktsü asoshi tamasa electoral merüktettsüla. Tang ya Nagaland electoral roll nung vote agütsütsü pur tenüng lakh terka ser meyirijang metsü shi lir. Ajisüaka, item rongnungji tenüng talila mesüra tiyazü enokba lakh pezü shi lir ta yakanü Kohima nung electoral roll shitak yanglutsü asoshi yimten aser lokti tentettem, den shisalemsateptsü asoshi Chief Electoral Officer-i Kohima nung senden ka ayongzüka akadang metetdaktsü. Chief Electoral Officer-i tang adoka aliba electoral roll nung nisung tenüng tiyazü mesüra talila lakh pezü lir ta ashibaji kechi komaser yamaji jangjaa ashiar memetet saka tiyazübo masütsü amai asenokia bilemer. Iba kasa osang ya anogo ishika jakdang ACAUT telokia metetdaktsüogo. Ashiko, CEO-i ashibajia ACAUT teloki metetdaktsüba osang nung ajemdaker ashir asütsüa akok mesüra ACAUT teloki sangdongba osangjiang CEO ajanga meteta sangdongba asütsüa akok. Aji oda, Nagaland electoral roll nung nisung tenüng talila lakh pezü alibaji shitak süra shitakba vote agütsütsü purtembo lakh tenet shi dang alitsü. Atangji, electoral roll nung nisung tenüng tiyazü aser talila paikaji aliba ajakjibo asaa enokba masütsüa akok, kechiyong Nagaland nung electoral roll yanglushiba mapang tenüng züluokertemia jungjunga shitak inyaktsü memeranger aser yimten telok (political parties)-temia temulung magütsür, anungji nisung ka tenüng electoral roll nung ken enokba to pa mesüra laji tangaleni oaka electoral roll nungibo magien odang alir. Aji oda, nisung asüyonga electoral roll nung tenüngbo alir, iba jagi balaka electoral roll nung nisung tenüng talila aika alir. Iba amaji kasa nisungba tenüng to town nunga alir aser pei yimtaka alir. Item ajakji merüktettsü asoshi mapang tajung ka arudagi, anungji asenoki electoral roll nung nisung tenüng aika enoknüaka meinoktettsüsa technology maparen ajanga nokdangtsü tenzükogo. Aji oda, technology ajanga masü saka asenoki asenoksasa tangatetba aser ochimulung agi asenok meyong electoral roll merüktetra ibajiang Tsüngrem aser nisung tsüngdang jenjangbo tuluba asütsü. Electoral roll merüktettsü jembidang, Naga nungertem rongnunga Aor tama asütsüla ta bilemer. Aji oda, Khrista yimsü tama agizükba kin rongnungi yimtsüng katibo peisasa tangatetba nung ochimulung agi ozü yimtakbo electoral roll shitak merüktetogo ta sangdongtsüsa tasü itta mapa küma inyaktettsü asü ta bilemer. Atangji, asenoki ochi mapa inyaktsü nungnanga bilemdang, Dimapur nung Angami nunger yim Diezephe nungertemibo parnoksasa par yimer electoral roll merüktetogo. Iba yimtak electoral roll nung vote agütsütsür pur ajak agi 672 liasüba nungi nisung tenüng tiyazü aser talila 274 puteta agienogo.Ibaji Nagaland nung election timi agitsü asoshi merangdangba mapa nung tenla tuluka asütsü. Ibaji Naga nunger ajak asoshi tayongzükba tulu lir. Kechi mapa nung südir süaka ochishia inyakbasa tajungba, iba jagi dang asenok nüchi kümdaktsütsü ta Laishiba nung shia lir. Aji oda, nüchi kümdaktsüba tetezüji shisa kaa kümdaktsütsü aser pei taküm aser kibong akümketa alitsüba indang ashir asütsü. Ochi ashibaji temoatsü kikümdang, anungji tanü Naga nunger ajak aibelener tiyazü agi ochi kümer aliba putu nung shibai aser koba yimi ochishia peitemenen nangzüka mapa agi pei temulungjang, pei taküm aser pei alidak electoral merüktettsüsa inyaker, iba  yimerjibo Tsüngremi MLA mesüra minister adokba dang nungi meyirijangben agi tajungba aser tuluba jenjang nung ajungkettsütsü ta amanger. Tanü asenoki Tsüngrem temeim aser Pa tashi amadoker, electoral sünga nütsüng yongsük dang nungibo voter teimba asütsüsa inyaktetba ya tuluka ama bilema nümadangdanga jembir. Ajisüaka, Tsüngremi tamajunger lepdoktsü aser ochishir nem yimli agütsütsü, idangjiang nübortem pelateptsü. Imlibilema taruba election-bo asenok ajaki jungjunga merükmerüka timi pei vote pei enoktsüsa agitsü bilema inyakdi.