Shitakba nüchiso

Naga nunger yimten nüchiso anguba anogo 73 buba yashi mongogo aser India nungertema kasa yimten nüchiso anguba anogo 73 buba tanü amonger. Tetezü Naga nunger o India nunger na ya kin kenyongi balala ta sayur. Ajisüaka, jepaka nüktsü malu kaji, shitakba nungbo Naga nungertem ya India kübok, India nunger kümer India nungertem nem mesüdaktsüba agi anogobo nüchiso saka nisungbo nüchi maküm ta Naga nunger timtem tia nung küm 72 aruogo. India nungerbo masü saka nüngdakba zülubanglu ajak nung India nunger ta zülutsüsa akümba purtemji Naga nunger lir. Delhi nungbo asenokiang tiyazü jembir amai tsümartemi asenok jak ngur asenok ya India nunger masüa ta ashir. Yamaji, külen India yimteni kangshia India nunger kümdaktsüba ajanga Naga nunger takoksa angur aser külen tsümartemi asenok ya India nunger masüa ta shia maksütsür. Atangji, tang tashibo Naga nungertem India kübok alena alinungji, election agiba nungi shir yimten yimsüsübaren ajak nung India temzüng kübok inyaker. Iba jagi asenoki meteta aser  memeteti India nunger kümadoker aser karibo India senso asütsübajiang kanga nümadanga bilemer. Ajisüaka, shitakba Naga nunger zü adenba Naga senso, shirnoki Naga yimten nüchiso bushiba maparen nung tetsübu, timtem takoksa, lendong , maksü aser asüama ajurua ali, parnok bang nung jagi India senso ta ashitsübaji kanga tasak lir. Tanü lanurtem rongnunga shirnoki Naga yimten nüchiso bushiba maparen nung India sepaitem ket nung Naga nunger reshikangshi timtem aser maksü ajuruba otsü meteta ali, parnok asoshia India senso-a ta ashitsübaji kanga tasak lir. Naga nunger rongnung tang arishi küm 40 teküpbok alirtemi India sepaitem ket nung Naga nungertem reshikangshiba otsü kanga jungabo memetettsü aser metetyonga majangshi aser tenük agi mangu nungji, kangabo süoki ia mebilemtsüa akok. Ajisüaka, tang arishi küm 40 ser tema taintem asoshibo India sepaitem ya tetsübutsü mojing telok amai dang bilemer. Aji oda, akhidangbo tanur ajepba mesüzüktsü asoshia India sepaitem dang tetshia liasü. Tanü taintem aikati India sepaitemi angati teyari agütsüyonga magir aser parnok canteen nunga kecha malir, kechiyong parnok dang jashiokbaji ulura nungji, amadoktsü makoker. Iba ama tia ka nung, kar India temzüng kübok pei linütsü jangratema lir aser aika Naga nunger yimten nüchiso bushiba maparen nung timtem takoksa ajurur. Iba ana tsüngda Naga lima aser Naga nunger kanga akoksadagi. Joko, asenoka shitakba nüchiso angutsü asoshi India temzüng kübok jangratema alirtem o Naga yimten bushirtem na pronglai pei ajangzüktsü asoshi masü saka Naga yimten asoshi taküm tenla agütsüa langa aser tarutsü Naga nunger lanu pututemia pelatsüsa yimten jenjang tajung ka memenui latettsüla. Atangji, India den mepilai alitsüa akok saka Naga nunger senso temeten mesamadaktsüi meraketa alitsüsa Naga nunger ajak atema yimten jenjang ka latettetra, ibajiang shitakba nüchiso angutsü tenzüker asütsü. Nüchiso ya yimten nüchiso dangbo masü saka rongsen nung aser temetetba nung tangar dang meshimetsütsüsa aser asüngdangtsüsa asenok malitsüla. Nüchisoji yimten talenba nungi salaba dang masü saka tetsübu tia nungi salaba dena lir. Ano, shitakba nüchisojibo bendanger kübok dang masü saka kasa sensopurtem tsüngdanga nümamedangtettsüsa aliba tia nungi peisasa nümadangtettsüsa inyaktetba mapatem asütsü. Kasa sensopurtem rongnungsa süaka karbo shi ango chir mechima langbang sünga yur achir, saka karbo chi basa chiyongtsüa maka; kasa sensopur saka karbo sen aika agüja school züngtetter saka karbo government school nung angati züngdaktsütsüa makoker; kasa senso purtem rongnungsa süaka karbo anogo shi süoshi tasen melentepa asemer saka karbo tenla kidangi semer aotsü tulua kata maka; kasa senso purtem rongnungsa süaka karbo sen lakh aika endoka sentsüpranga kiyimba benjong agüja kibong akümer saka karbo süngo jemdaktsütsüa makoker ta asüba tia nung aika nüchi mekümteti lir. Item tiaji bilemdanga takar o makar na tsüngda ongdang talangka melii ajak pei taküm aser kibong agi nümadangteta litettsüsa inyaktetra, ibajiang shitakba nüchiso asütsü. Iba nüchiso bushirtemjibo asenok ajak ya lir. Iba shitakba nüchisoji sangküm iba mapang yabo ngur alitsüsa asenok o aser mapa nung meshiteta lidi.