Shitakba ratetba ojang kar ocet nungi kü tangatetba

~ Talitemjen Imchen.

Yimya agi kaket zülur kati pei jangraba ajak abensaa metetner. Iba jagi kaket zülur ka molung süa asüngdangdangji, aiben purmedemer tajungtem tezü adanger. Kaket zülur kati peii züluba ji dang shitak ta masü, saka peii züluba nung tangatetba aser tasüngdangba lemsatepba ji kanga aginer aser nia aginer. Ashiko tedir P. Renthy Jamir-ia iba ocet ya ngur pelatsü südi?
April 21 st aser 22 nd SHITAKBA RATETBA OJANG KAR kentet ocet nung nibo kanga temoatsü ngua züngogo. Ashiko ni ama tazünger aika temoatsü ngur alitsü südi? Kü tangatetba ya tai asütsü akok, ano iba ocet nung ni angatetba aser amshinüba kar medenloka lemsateper.
Tejen putu mapang, azüngzülu mashir, parnoki jatetba aika jayajako mebenteti jasar aliba ji, tanübo asen-i metetba yari, timi bentet benteta nükmen shitak nung jateta amshitsü nüngdaker. Parnok mapang oshi ji tera dang liasü aser ajia parnoki chinteta (filter) mamshi.
Ao oshi nung ojang ta asüba ya nibo English oshi nung letter dang ya janer. Aser olong English oshi nung meaning dang ya olong ta amshiner. Koba tetezü, tongmelang agi ojang ana asem meyokteper olong aküm.
Yongkok züng (Sl. No) 2 nungji, Ajurushi (shi ji meat nung agüja lir). Saka yim aikati ajurushi olong ji, ajurushiogo/ajuruadokogo ta asüba nung amshir. Koba tetezü tajung asütsü asü tamajung asüar, ajuruadokogo ta terata nung jembiba mesüra bilemba ka. Shiruru tepseter mezüng ajurua shi anguba ji dang masü, saka taküm shiruru Por, Jangya Ak, Ngümnak amala (etc) ajurudanga ajurushi/ajuru ta ajar. Aser aji arok nüngja (common Noun) nung amshitsü kanga junger.
Yongkok züng 5 nungji, Akpur meshi, iba o (word) ya ana nung masü, ka nung dang amshi tajungba. Akpurmeshi/akpurmashi. Akpurmashi olong ratet nungji, olong luben (source=lutet + aben = combine word) ji tejangja ka maliba sayur. Yongkok züng terka (11) nung lemtamatar olong yangluba amaji, luben ji junga alitsüla. Tanü asüng Broiler An aser Kroiler An arur, kecha tebentet mapang ka mali kongsar dangashi, asen-i meteta An-i ako shitak nung dang akong. Tsürabur mapang anütettsü (watch) maliasüji, An akongba yima aser ozü sangnu akongba yimya nung dang mapangji apir, wadangtem ji inyaktep aser senzütep. Yamaji anütettsü maliba mapang, anepdang sakba yimyaji, An akongba yimya nung dang mapangji apir saktep. An-i mezüng 1:30 ako nung akonger. Parnoki kasa (normal) mapalem (routine) inyaktsü asoshi An-i mezüng akongba mapang nungji mesak. Ak tepsettsü anogo nungbo, An-i mezüng akongdang Ak shi awazürtem ji sakadok. Ak chioker mesüba mapang, Ak ji tsüin (store) nung mejangdaktsü. Alima ji (1: 30 mapangji) kanga tammang, saka tsüin nungji Ak ji mejanga melirapang amongi oa bushitsüla. Kodang Ak ji tsüin nung lidir, 1:30 ako ji ano Ak aputsü karara.
Iba mapang, item Ak aputsüpurtem/awazütsüpurtem jagi Ak aputsü ano mapang matong ta jembiba nungi adokba medentep olong ka dang lir. Lialia yimertem yipden nung mejangba mapang, anepdang yakta saker Ak tepsettsü senzür dangji, Akpurmeshi/akpurmashi senzür ta jatet. Saka joko Ak metsüba yimya melenshiadoker ji, iba olong ya samadoktsü südi? Aser angazükyonga tajangzük malitsü südi?
Yongkok züng 8 aser 9 nungji, KIBASÜ ASER KIPARÜRÜA ta aliba ji, kiba olasü (tone) ji kasadang lir. taji zülusü (spelling) ji medema amshidi. Ano kibarürüa ta masü olong ji kibarürü ta nüngja ji tobur tajungba.
Yongkok züng 16 nungji, Pusem olong yabo English olong ji support ta amshi tajungba.
Yongkok züng 17 nungji, remso tetezü metsü agi arükba, tenük atsüshiba mesüra pongmang balala pongmangba ajanga takzüteter aser asen-i remso angutsü meteter. Item tatalokbatem ji kecha meliaka, “Remso asütsüsa pongmanga kecha mepongmang sernung” taa jembir. Iba jagi kechi asen-i meimlai achiajemtsü angur, mesüra asen pelatsüsa ajurur, iba dangji remso ajatsü junger. English olong nungbo good luck jiang aiben agi anasaba lir.
Yongkok züng 19 nungji, wangküm ya arok nüngja (common noun) lir. Koba tetezü kechi agi wakzüka aluba kümpanger iba dangji ajar. Iba olong nung “küm” tetezü kümpangba dang ajar aser “wang” tetezü awakba dang ajar. Techanu maputsü mapang mama awanger. Tainlong mapang tetsür mama awanger. Wakdakba dang ajar. English oshi nung Adam apple dangji, Ao oshi nung wangjang ta ajar. Yim aikati tekong nung wakteta aliba tejang dang ya wangjang ajar.
Saka joko bentet benteta azük tenüng ji jateta amshitsü junger. (Necklet or necklace, anklet or wristlet) tekongzük, tekazük mesüra tetsüngzük, item ajak arok nüngja dangji azük ta dang jadi.
Tetsür brassiere (bra) dang ya wangküm ajatsü junger.