Shitilong SA-i 1-0 agi OCYU koka semi-final-i iogo

Mokokchung, October 19 (TYO): Imkongmeren Sports Complex nung tang tasayadak XXI MDFA Trophy, 2015 nung Hombar nü Shitilong Sporting Association-i tanabuba quarter-final asaya nung goal ka agi OCYU kokogo.
Iba asaya asoshi match patron ji Assistant Director, Food & Civil Supplies, Mokokchung, Lipoknungsang liasü.
Shitilong SA goalkeeper-i ball kanga junga pushiba agi mezüng minute 45 asaya nung OCYU-i kanga meranga asayaka goal ka danga meyoktet. Aji dang masü saka parnoki anaben tashi goal tonga bener lur tezülensa metsütok.
Shitilong SA-i mezüng half nung kanga tendanga asaya aser balakata defender Kezevitu (jersey no 2) den külem defender temi ball kanga junga nokdangtetba ajanga goal aika kümzüktet.
Ajisüaka asaya tanabuba shilem nung Shitilong SA-i kanga yakyaka asayatsü tenzük aser minute 51 buba nung OCYU defense nung tapok atokba ngua Shitilong nungi striker tajungtiba rongnung ka ta züngshia alisang, Sakutemjen-i pa nem agütsüba pass ka OCYU defense paitoka bener lua goal agütsü.
Iba sülen telok anapronglai goal ka danga magütsüteti asaya tembang.
Shitilong SA-i tanü OCYU akokba ajanga parnok semi-final jenjang tongtetogo aser parnok NU Lumami (PGSU-L) den October 22 nü semi-final asayatsü.
Iba match reprangdang Assistant Director, Food & Civil Supplies, Mokokchung, Lipoknungsang-i MDFA nema sen 15,000 tenla agütsü.
3buba Quarterfinal asaya Mongolbar nikongdang 1:00 ako nungi Arrjusanger FC aser Fusion SC na asayatsü.