Shiv Kumar Yadav taküm piyong tepouktak ayutsü

New Delhi, November 03 (Agencies): Mongolbar nü court kati yaküm Delhi nung tashiyim amshia tetsür ka raksatsüsang Uber cab anir, Shiv Kumar Yadav taküm tepiyong tepouktak ayutsü asoshi obendang agütsüogo.

Iba ken o tulu nung aibelensang taochi angutsü malang ta prosecution-i benokbaji additional Sessions Judge, Kaveri Baweja-i agizüka liasü.

Tepouktak ayutsü obendang den külemi court-isa Shiv Kumar dang senchi 21,000 chiogo.

Iba dak alia Court-i Yadav’er kibongji makamait kibong ka, anungji par kibong nem teyari kar agüjang, ta tuyuogo.

Yaküm December 5 nü Yadav-i pa indang taxi nung Central Delhi, Inderlok tesem nung alir tetsürlaji nisung maliba tesem kati anir aoba sülen tashiyim amshia raksatsüba sülen taküm October 20 nü court-i pa aija liasü, aser tanü pa nem obendang agütsüogo.

Oct. 20 nü Judge, Baweja-i, tashiyim amshia raksatsüba, temang mejungi yirutsüba, tetsür ka taküm lendongi yokba aser nisung apuba ken otem nung Yadav aija liasü.

December 7, 2014 nü Delhi Police-i pa Uttar Pradesh, Mathura tesem nungi apuba sülen taküm January 13 n court-i Yadav anema ken o benoka liasü.

Tanü Yadav Tihar Jail nungi court-i anir arur pa anema obendang agütsüdang poa kanga aoksa. Okadak obendang agütsüdang par tsürabur, kinüngtsü aser par tanur anaprong liasü. Iba obendang agütsüli Yadav kinüngtsü den tanur anaprong ajep.