Shiv Sena-i opposition den land bill senden nung adentsü

New Delhi, July 28 (Agencies): NDA den külem ser aliba Shiv Sena party shirnoki land bill atema kanga akhanga nokdaker, parnoki Opposition party tem den lokteper 2013 Act melenshiba maparen nung shilem agitsü.
Iba Act nung temelenshitsü kar benoktsü asoshi parliament nung Joint Committee mamen tashi mapang agüja lir.
Opposition rongnung tongtiba, Congress-i tanü, Mongulbar nü parliament nem iba Act nung temelenshitsütem aser ajak nem ali melen temonok kasa agütsü temipishiba tarensen agütsüogo. CPI(M)-ia parnoki bilemba temelenshitsütem tekaraba nung agütsütsü sentong lir.
August 5 matong tashi nung anogo talila agisema parnok report agütsütsü, ta BJP MP S S Ahluwalia-i aniba parliamentary joint committee-i yashi, Hombar nü telemtetba ka agiogo ibaji atema Congress o tanga opposition party tem külemi lokteper temelenshitsü tarensen kar bendendar.
Tanü, Mongulbar nü NCP tekolakba Sharad Pawar’er kidang senden ka amenba nung Shiv Sena nungi Anandrao Adsul, congress nungi K V Thomas, Trinamool Congress nungi Kalyan Banerjee, YSR congress nungi MP Vara Prasadarao Velagapalli aser CPI-M nungi Md Salim nunger tena liasü, ta osang ka ajanga ashi.
Congress sangdong ka ajanga ashiba agi, ali kibur noklang nung shilem 80 dang nungi ‘private projects’ atema temelaba agiogo aser shilem 70 dang nungi public-private partnership (PPP) atema temelaba agiogo.
Tang aliba bill ajanga sorkar indang ali tashi nung tapu pongu nungi jenbudaktsür- defence, rural infrastructure, affordable housing, industrial corridors aser infrastructure projects koba nung public-PPP project tema dena lir.
BJD aser Trinamool Congress natibo Joint Committee dangi parnoki aginüba temelenshitem tezüluba nung agütsüogo aser iba nung NDA-i latetba bill rangben agientsü shia lir.
Sorkari bener aruba Act ji UPA-i bener aruba land bill agi melentsü congress tebilemba lir.
Pawar’er kidang senden amenba mapang Congress, Trinamool Congress aser CPI-M telok temi ashiba agi, NDA-i latetba land bill rangben agiendaktsütsü.
Shiv Sena-ibo bill rangben masü saka kar dang melenshitsü tebilemba lir.