Shiv Sena-i tanga state tem nunga BJP anema tokteptsü

Mumbai, November 29 (Agencies): Maharashtra nung Shiv Sena-i Congress aser Nationalist Congress Party (NCP) den lokteper sorkar akümba sülen Shiv Sena-i tanga state tem nunga BJP anema tokteptsüa akok.
Hokolbarnü Shiv Sena lenir, Sanjay Raut-i, Goa nunga Maharashtra nung atalokba ama sayatenya ataloktsü, kechiyong BJP den teloktep party- Goa Forward Party-i Shiv Sena den lokteptsü asüngdangogo, ta metetdaktsü.
Raut-i, “Goa Forward Party Tir aser Goa nung taoba Deputy Chief Minister, Vijai Sardesai nati Shiv Sena den lokteper. Maharashtra nung atalokba ama Goa nunga yimtenren tensa melenshidar. Kobi melii nenoki Goa nunga sayatenya atalokba angutsü,” ta ashi.
“GFP Tir, Vijay Sardesai densema MLA pezüi Shiv Sena den jembidar. Ni-a Maharashtrawadi Gomantak Party tongti, Sudhin Dhavlikar den jembiogo. Goa sorkar pusemba MLA kari onok den tongtepratepdar,” ta Raut-isa ashi.
“Shiv Sena-i linük nung tanga tesemtem nunga BJP nung madenba teloktep yanglutsü. Ibaji linük tesem ajaklen ataloktsü. Maharashtra sülen tang Goa nung atalokdar. Iba sülen onoki tanga state tem nunga teloktep yanglutsü. Iba linük nung onoki BJP madenba Front ka tentetner,” ta pai metetdaktsü.
Shiv Sena lenirisa, “Goa sorkar ya tim masüba inyakyim ajanga tentet. Onoki iba state nung Congress densema Front balaka tentetner,” ta ashi.
Menden 40 aliba Goa assembly nung BJP MLA 27, GFP MLA asem, Congress MLA pongu, NCP aser Maharashtrawadi Gomantak Party (MGP) MLA kaka aser Independent MLA asem lir.