Shiv Sena MP, Ravindra-i Air India ketdangser ka dak azük

New Delhi, March 23 (Agencies): Shiv Sena MP kati Air India staff ka dak slipper kati azükba sülen MP-ia pai yamaji inyakogo ta nangzükba nung ajemdaker Air India-i pa anema ken o ka agutsüogo.
Shiv Sena MP, Ravindra Gaikwad-i azükba dak sentakba nung Air India duty manager, arishi küm 60, Shivkumar-i, pai yamaji ataloktsü ta kodanga meimlai liasü, ta ashi.
Shivkumar-i, “Pai kü dak tim mesüi benshi, pai kü nükrangtsü raksatsü. Asen MP tem-i yamai benshira Tsüngremi asen linük kümzükang,” ta ashi.
Shiv Sena MP anema FIR ka agutsüogo aser Air India-ia, tashiyim amshia tayimtsü minute 40 menodaktsüba atema pa anema FIR ka benokogo.
MP jagi Air India nung inyaksang tola button raksatsü, nükrangtsü raksatsü aser slipper agi pa dak züka tayimtsü nung ketdangsertem matsüngdang pa kanga maaksütsü.
Air India-isa, tayimtsü nung tim mesü benhirtem tayimtsü nung amentsü memelatsü atema latettsü shisadangdar.
Air India-i sangdong ka ajanga, “FIR benokogo, tim mesüi benshir passenger tem tayimtsü nung amentsü memelatsü atema shisadangdar,” ta metetdaktsü.
Air India-isa iba tatalokba bushisüngdangtsü atema committee ka tentetogo, aser kobi melii iba report ji Ministry of Civil Aviation nem agutsütsü.
Iba tatalokba aija Civil aviation minister, Ashok Gajapathi Raju-i, yimtenren party kechaia iba amaji pu masemtsüla, ta ashi.
Ano külen Shiv Sena MP, Manisha Kayande-ia, Gaikwad-i inyakbaji party-i aitsür aser iba tatalokbaji junga bushisüngdangtsüla, ta ashi.
Kayende-isa, “Ravindra Gaikwad-i pai yamaji inyak ta nangzükogo, ajisüaka Shiv Sena-i ibaji aitsür. Pa ya nüngtugu MP ka lir. Pa ain adoktsüsa kechi atalok’ar onoki metetner,” ta ashi.