Shivakumara Swami arishi küm 111buba nung süogo

Bengaluru, Aenjeti/January 21 (Agencies): Arishi küm 111 tain Karnataka, Tumakuru nung Siddaganga Mutt seer, Shivakumara Swami süogo. Pa anogo 15 shi temang mejungi lir asü.
Pa Hombarnü anepdang 11.44 ako nung asü aser pa temang Mongolbar, January 22 nü 4:30 nung arongtsü.
Pa asüba atema anogo asemnü mang ayimtsü ta Karnataka, Deputy chief minister G Parameshwara-i sangdongogo aser state ajunga mang ayimba nung shilem ka ama tanü Karnataka ajunga nung sodi sangdongogo.
Pa sülen anidakertemi pa dang “walking god” ta ajar aser aso 12buba nung social reformer Basava incarnation ka ta züngshir. Lingayat seer ya Sree Siddaganga Education Society tekolakba lir. Iba kübok state nung engineering college aser business school tem densema educational institution 125 shi lir.
Item institution timba ka nung kaketshisatsü aser boarding facility tem sensaker kaketshirtemnem angati agütsür.
Karnataka chief minister HD Kumaraswamy-i Swami indang osang tejangja agitsü asoshi Mutt semdanga liasü. BS Yeddyurappa, MB Patil, KJ George aser Sadananda Gowda nungera CM den külemi oa liasü.
Swami, shiba India nung arishia alir rongnung ka ta züngshia liasü, pa tepokpok nung timtem aliba ajanga taoba hopta ishika kangshia liasü. Pa küm ishika mapang mapangshia tambur akümba ajanga temang nung timtem adoka mozüki nungsa munga liasü.
Pa sülen anidaksertemi pa taneptsü meshija sarasademtsüi aruba mapang ka nung Mutt nung security tali akangshiogo.
Pa Karnataka, Ramanagara district kübok Veerapura yimtsüng nung 1907 küm April 1 nü aso. Swami ya nüburtem ajangzükdaktsütsü asoshi inyakba maparen aika nung shilem agia aruogo aser 2015 küm pa nem Padma Bhushan naroküm agüja liasü.
Swami-i lokti ajangzüktsü asoshi maparen balala nung shilem tajung agiba tushitsü atema taoba hopta Kumaraswamy-i pa nem civilian award rongnung tematiba Bharat Ratna agütsütsü asoshi khanga liasü.
Kasa mapang nung Swami asüba osang angazükba sülen Ato KIlonser Narendra Modi-i Twitter ajanga ajanga asükhu lemsatepa liasü. “Dr. Sree Sree Sree Sivakumara Swamigalu-i nüburtem talisa sensaksetem atema liogo. Pai pa taküm lokti nung tebendang aliba, sensaktia aser ayatsür aliba samaja item tebilemtsütem ajungkettsü asoshi bendanga agüja inyakogo. Alima ajunga nung pa sülen anidakertem den kü sarasadem aser asükhu lemsateper,” ta PM?Modi-i tweet asü.
Maneni Tir Ramnath Kovind-ia Swami sülen anidaksertem den asükhu lemsatepogo. “Tamangba tsütsü lenir Dr Sree Sree Sree Sivakumara Swamigalu asüba osang angazüka temulung mepelar. Pai lokti asoshi tajung aika inyakogo aser talisa healthcare aser education tsütsü bendanga agüja inyakogo. Pa sülen anidakser ajak den asükhu lemsateper,” ta Tir-i tweet asü.