Shivraj Singh CM menden nungi aludaktsütsü Congress-i akhanger

New Delhi, July 06 (Agencies): Vyapam ochimashi ken o dak sentakba nung Hombar nü Congress-i, iba ken o tashishitsü makai jung-junga bushisüngdangtsü aser nisung 45 asüba asoshi khuret magitsü atema Madhya Pradesh chief minister Shivraj Singh Chouhan menden nungi aludaktsütsüla, ta shiogo.
Iba ken o nungsa Ato kilonser Narendra Modi-a aija opposition party-i, item tatalokbatem indang pai rasa-a ashitsüla aser khuret süa agitsüla, ta ashi.
“Shivraj Singh Chouhan menden nungi atsüngdaktsütsüla aser Vyapam ochimashi ken o tashishitsü kecha makai junga bushisüngdangdaktsütsüla,” ta tanü New Delhi nung Congress Party otongdar Randeep Surjewala-i ashi.
Congress-i ashiba agi, iba ochimashi ken o ajanga 2007 küm nungi 2013 küm tsüngda candidate lakh 76 shi kongshiogo.
“Vyapam ya tatidangtem ketdangsütsü asoshi tentet aser 2008 küm nungbo parnokisa mapa nung shimoktsü tatidang achayangtsü asoshia lemtet. Vyapam-i ketdangsüa tatidang agiba nung ochimashi tulu liasü, koba ajanga 2007 küm nungi 2013 küm tashi nung candidate lakh 76 jungnüa kongshiogo. Iba mapang nung tang pua aliba Laxmikant Sharma Madhya Pradesh nung higher education minister liasü. Dec. 2008 nungi March 2012 tashi Shivraj Singh Chouhan medical education minister inyaka liasü, aser paisa iba portfolio (higher education minister) bena liasü,” ta Congress lenir Randeep-i ashi.
Taoba mapang Union home minister P Chidambaram-ia, iba ken o nung ano nisung masütsü yimya nung masüdangyongi Madhya Pradesh sorkari iba ken o ya CBI nem bushisüngdangdaktsütsüla, ta shiogo.
Congress headquarters nung osangbenertem den jembidang Congress otongdar P C Chacko-i, “Ato kilonseri iba ya rasa-a ashitsüla aser linük nung tang atalokbatem asoshi khuret abentsüla,” ta ashi.