Shoaib Akhtar-i pa taküm otsü nung Salman nem shilem agidaktsüner

New Delhi, July 07, 2016 : Tesüiba mapang Pakistan nungi cricket ball kangsa kara aoba ajanga ‘Rawalpindi Express’ ta tenüng jaloktsür alisang, Shoaib Akhtar-i, “Kü taküm otsü dak ajemdaker film yanglutsüji ni sapur aser film yanglurtem dak aket aser ibaji ataloka asünunga Bollywood film actor Salman Khan nem ni ama shilem agidaktsüner,” ta ashi.
Saisapongertem taküm otsü nung ajemdaker yangluba “Bhaag Milkha, Bhaag,” “Mary Kom,” “Sultan” aser “Azhar” film tem tang Bollywood nung kanga saputeper aser tang “Indian Mazak League” comedy sentong nung tetendanger rongnung dena alisang Shoaib Akhtar-a item film tem nüngtugu akümba shisem.
“Tanü asüng iba amala film kanga saputepa nia meteta lir, ajisüaka ni telemtetba agitsü makok. Tangari kü taküm otsü junger mesüra tatishitsü tajung ta bilemra parnoki film yanglutsü akok saka yamaji masü ta bilemra kecha masü. Film yanglutsü atema telemtetba agitsüji asen sapur aser film yanglurtem dak aket,” ta IANS-i email ajanga interview ka agiba mapang Rawalpindi, Pakistan nungi Akhtar-i ashi.
“Tatishitsüka kü taküm otsü nung film yangluka asünunga ni Salman Khan nem ni ama shilem agidaktsüner,” ta Akhtar-i shisem.
Tang nungi tenzüka asenok Akhtar ya India nungi cricket asayar Harbhajan Singh den külemi iba comedy sentong nung angutsü.
Iba sentong ya Life OK nung memunui yoktsü.