Shooting World Cup nung Manu-i gold medal ana angu

Guadalajara (Mexico), Metsüremi 6 (Agencies): ISSF World Cup nung India tsür pistol akhar Manu Bhaker-i gold medal ana koktetogo. Arishi küm 16 Manu-i 10m Air Pistol tetoktepba nung gold medal ka angu aser Om Prakash Mitharval den külem 10m Air Pistol temeyoktep asaya nung gold medal tanabuba angu.
Kija asaya nung Manu-i point 237.5 nguteta Alejandra Zavala Vazquez madak takok angu shibai point 237.1 ngua liasü. Tena sülen tasembuba jenjang nung France tsür Celine Goberville liasü. Lai point 217.0 angu.
Manu indang teammate Yashaswini Singh Deswal-i point 196.1 nugteta pezübuba jenjang nung tembang. Temeyoktep asaya final nung Manu aser Mitharval na senteper point 476.1 ngua gold medal akok, kaoba India nunger atema iba asayamung nung gold medal tasembuba liasü.
Iba World Cup nung India nunger asayartemi medal tenet kokteta tang parnok temaba jenjang nung lir. Temeyoktep asaya nung Germany nunger asayar Sandra aser Christian Reitz nati point 475.2 nguteta silver medal angu aser France tsür Celine aser Florian Fouquet nati point 415.1 nguteta tasembuba jenjang nung tembang.
India nunger rongnungisa Mehuli Ghosh aser Deepak Kumar nati 10m Air Rifle temeyoktep asaya nung bronze medal nguogo. Tanati point 435.1 angu. Iba asaya nung China nunger asayar Xu Hong aser Chen Keduo nati point 502 ngua gold medal akokba dang masü saka otsü tasen ka yangluogo.
Romania nunger Coman Laura-Georgeta aser Moldoveanu Alin George nati silve medal angu aser India nunger Ravi Kumar aser Apruvi Chendela na pezübuba jenjang nung tembang.