Shopian nung kiralongrar asem khaset

New Delhi, Aenjeti/January 22 (Agencies): South Kashmir kübok Shopian district nung kiralongrar asem khasetba nung Indian Police Service officer ka adianu densema liasü. Anepdang züngia lia security force temi kiralongrar tem jenoka aliba tesem amak, ta ketdangsertemi metetdaktsü. Force temi ali telung nung aliba bunker ka dena raksatsüogo.
Osang ajanga ashiba agi, IPS officer ka adianu Shamsul Haq, medicine degree course agia aliba toktsür kiralongraba telok Hizbul Mujahideen nung aden.
Taoba Jammu and Kashmir DGP, SP Vaid-i tweet ka ajanga iba osang jangjatsüogo aser ashiba agi, “IPS officer adianu Shamsul Haq shiba kiralongraba telok ka nung denogo pa densema tanü Shopian nung kiralongrar asem khasetogo. Pa adianu, kinungertem aser J&K Police-i pa temai adokdaktsütsü merangba ni bilemteter saka pa tia maka tanü süogo.”
Ali telung nung tatsükokdak ka nung kiralongrartem jenoka aliba osang tejangja ka angazükba sülen police, army aser CRPF senteper iba tesem amak.
Iba masüdang anogo ka jelia Al-Badr telok nungi kiralongrar asem Budgam district nung khaseta liasü. Parnok ya Shopian tesem nungi liasü ta ngutetogo.