‘Show’ ketdangser Jim arishi küm 82 nung süogo

November 21, 2015: “Card Sharks” aser “$ale of the Century” show tem ketdangasüba ajanga kanga nüngtugu akümsang, Jim Perry arishi küm 82 nung süogo.

Perry küm pongu tashi cancer tashidak agi kangshiba sülen Hokolbarnü Oregon nung kinungtsü aser par tanurtem ajak lia asü, ta variety.com ajanga metetdaktsü.

“Tanü onok asoshi tebu, tembar aser kinungbo tajung ka iba lima nungi pilaogo. Pa ama shinga mangutsü südi. Pai akümlidang nisung million aika pai shilem agiba ajanga peladaktsüogo aser pa takok tulutibaji lanuwa kanga sensak tia nung liaka pai iba madak takok ngutetba lir aser ibaji ajanga kibong kanga anisüngzükdaktsü,” ta kibong sangdong ka ajanga ashi.

Pa nem naro agütsütsü melena yimti nung aliba cancer anepaluba mozüki ka nungang tenla agüjang, ta par kinüngertemi mepishi.

Perry-i tesüiba mapang model, arishi küm 56 kinungtsü, June, jabaso Sean, jala Erin aser semchir asem toktsür iba lima nungi pila.

Perry lanur asüba mapang nüngtugu basketball asayar ka liasü aser pa nem ‘Big Jim’ ta tenüng jalokja liasü. Pa aso, feet 6 ser inch 4 talang liasü. Perry University of Pennsylvania nung azüng aser iba mapang ‘Special Services’ nung dena Korea nunger den raraba mapang Armed Forces Radio nung inyak.

Pa iba mapa nungi anisüngzükba sülen asaya-menür (comedian) Sid Ceasar den külemi küm aika shilem agia jaja.

Pai 1967 nungi 1990 tashi Miss Canada sentong nung sentong ketdangser ka ama inyaka aru. 1969 küm Joan Rivers-i shilem agiba sentong “That Show” pai sangdong aser 1969 nungi 1972 tashi hopta tatem aonungshi sangwa WABC radio, New York nung Disc Jokey (DJ) inyaka liasü .

1974 küm Perry ya  “Headline Hunters” show atema sentong ketdangser ka aküm aser iba sülen “Definition” game show ayongtsü tenzük. Canada television otsü nung game show ya TV nung talangtiba sayuba show ka aküm.