Shrivastava-i Hi-Tech Vegetable Seedling Production Unit semzüktsü

Dimapur, Aenjeti 23 (TYO): State Horticulture Nursery, Dimapur nung Aenjeti 23, 2018 nü Additional Secretary, DAC & FW, Ministry of Agriculture & Farmer’s Welfare, Government of India, Jalaj Shrivastava, IAS-i Hi-Tech Vegetable Seedlings Production Unit semzüktsü.
Iba Unit semzüktsüba sentong nung jembiba mapang, Shrivastava-i sentong nung adenertem dang tsüngkum mongpu aser tsüngsang melenshiba den anidaktsü ajungshi.
Iba tesem nungi adokba product tem tajung asütsüla aser kasa mapang jenjang talang asütsüla, ta pai ashi. Pai-sa iba mapang, ‘post-harvest management’ aser ‘packaging’ maparen ya kanga tongtibang lir, ta shisem.
Horti sector nung state kanga junga inyakdar aser Ministry of Agriculture kübok Technology Mission Programme tem amshiba ajanga takok jenti anguba den külemi aluyimertem sen aika aazüker, ta Horticulture Director, Dr, R. Elithung Lotha-ia iba sendong nung jembidang ashi. Mozü mamshi adokdaktsüba süngjanglijangtem (organic products) dangaleni yoktettsü asoshi Nagaland temsüa lir aser item oset alirtemi kasa maparen nung tejangraba aliba sayuogo, ta pai ashi.
Dimapur nung nütsüng yongsük lakh 3-4 dak tali lir, anungji aonsotsü aser süngjanglijang aika nüngdaker. Anungji metsüjang tajung adokdaktsütsü asoshi iba ama Unit ya kanga nüngdaker, ta Elithung-isa ashi.
Iba Unit sorkar aser nija sentepa mapa küma inyaktsü mechi ketdangser aser lanurtem horticulture sector nung jangrartem Skill Development training agitsü yoktsü asoshi Department sentong lir, ta pai-sa metetdaktsü.
State Horticulture Nursery, Dimapur nung Hi-Tech Vegetable Seedlings Production Unit ya sen crore 2 indoka Saveer Company ajanga yanglu. Secretary to the Government of Nagaland, Alan Gonmei, IAS-i iba sentong ketdangsüa ani aser Deputy Director, Horticulture, Jerry Patton-i tepela o jembia liasü.