Shweta Agarwal tepsetba atema tetong aitsüogo

Guwahati, July 30 (Agencies): December 4, 2017 nü Guwahati nung Shweta Agarwal tepsetba ken o atema tanü okadaki Govind Singhal aitsüogo.
July 31, 2019 nü District & Sessions Court of Kamrup (M)-i temerenshi osang metetdaktsütsü.
Okadakisa Singhal tetsü Kamla Devi Singhal aser tenu Bhawani Singhal na aitsüogo.
December 4, 2017 nü Govind aser Shweta na raratepba sülen Govind-i Shweta tekong nung arang aser südaktsü. Iba sülen pai mezüngbo mangji bosta ka nung seper Bharalu nung yutsütsü sentong atong, ajisüaka tetsü aser tenu na teyari agia mangji par metsümeshidak rongdok, ta police-i bushisüngdangba osang metet.
Kiyongertemi Govind’er kidang nungi mokozü adokba anguba sülen Shweta tepsetba osang metet. Govind, tetsü aser tenu nungertemi Shweta la sasa soseta asü ta ashitsü merang, ta police-i ashi.
Shweta ya 2015 küm Commerce stream nung 12th grade tatidang nung state topper liasü. La tepsetba mapang la KC Das Commerce College, Guwahati nung 5th semester B Com student liasü.
Govind aser Shweta naprong Guwahati nung CA firm ka nung mapa inyaka liasü. Tena junga dang liyonga aru saka Govind-i pa Siliguri nung oa alitsü sentong atongba ajanga tena tsüngda mangatettep adok.
Shweta-i Govind den kibong akümtsü mulunga liasü saka pai la ani masüngba atema tena mapang shia raratep. Ajisüaka, Shweta’er kibongibo tena meimtepba ya memetet liasü.
December 4, 2017 nü Shweta-i college uniform semer Santipur nung Govind’er kidangi ao. Idangji tena mangatettep adok aser kati ka nungokja raratep. Iba mapang Govind-i la jara nung tashi agi nungoktsü aser idangji la ola tashii adok aser süchia ao. La teküm raksar liasü, ta taoba Guwahati Commissioner of Police, Hiren Nath-i ashi.
Sweta süchia aoba sülen Govind kanga aoksa aser idangji pa la indang mang Bharalu ayong nung enoktsü bilem. Pai bosta ka nung Sweta indang mang enoker bike nung alenloker ao saka tangari pai bosta abenba ngur asü nung, pa mejenbutsü ta bilemer kidangi meyipa ao, ta police-isa ashi.
Iba sülen Govind-i Shweta indang mang par kidang metsümeshidaki bener ao aser kerosene shiloktsür mi senoktsü
Tanü okadaki obendang agütsüba sülen Shweta Agarwalla tebu Om Prakash Agarwalla-i aibelenertem süngzü agi alensettsüla ta takhangba agütsü.
Shweta tebui obendang pelaa agizük aser ozüng amertem dang pelaba metetdaktsü.
Par asem süngzü agi alenset nungbo ni temulung süneptsü, ta paisa ashi.
Govind Agarwal ya Radhe Shyam Agarwal’er jabaso lir.