Siachen nung samaba sepai 10 angutsü teimla mali: Defence Ministry

Delhi, February 04 (Agencies): Brihostibarnü Defence Ministry-i, Siachen nung aliba army post ka rürlung agi anenbangba lendong nung samaba sepai 10 ji mengutettsüa akok, ta metetdaktsü.

“Army aser Air Force na nungi specialized team-i Siachen nung rürlung agi anenbanga aliba sepaitem kümzüktsü atema tanü agi anogo ananü merangdagi. Iba maparen nungsa amshitsü atema tanep specialised equipments tayimtsü ajanga Leh-i bener ogo,” ta Defence Ministry otongdari ashi.

Paisa, “Ajisüaka akümlirtem angutsüji kangbo teimla mali ta onoki sasaseta ashir,” ta ashi.

Bodhbar anepdang züngia Ladakh region nung aliba Northern Glacier nung feet 19000 tenem nung aliba army post ji rürlung agi anenbanga liasü, aser iba lendong nung Junior Commissioned Officer (JCO) ka densema sepai 10 samaogo, aser parnok ajakji Bihar regiment 19th battalion nungi lir.