Siang ayong nung tzünokdang yanglutsüba anemer

Itanagar, October 6 (Agencies): Arunachal Pradesh kübok Siang ayong nung NITI Aayog-i tzünokdang tuluka yanglutsüba atema benoka aliba sentong nung tetsükdaktsü adoktsü, kechiyong Siang Indigenous Farmer’s Forum (SIFF) ajanga, Siang tesem nung aliba nüburtemi Siang ayong nung 10, 000 MW hydro power project ka yanglutsüba atema benoka aliba ya khen yongi magizüker, ta osang tejangja ka state sorkar aser NITI Aayog dangi yokogo.
Osangbenertem den jembidang Forum-i ashiba agi, parnoki state sorkar aser NITI Aayog dangi parnok telemtetba agienang ta shia tezüluba nung takhangba ka agütsüogo, aser parnoki iba takhangba magizüki Siang ayong nung tzünokdang yanglutsü asoshi apusora temzüng ozüng tsütsü timtem adoktsü, ta amokmeren.
Arunachal ya high seismic zone ka lir aser iba amala tesem ka nung tzünokdang tuluka yanglutsüba ya lendong lir ta metetdaktsüba den külemi tawa Ranganadi tzünokdang ajanga Assam nung tzümetsüng arudaktsüba indang SIFF General Secretary Tasik Pangkam-i metetdaktsü. Paisa maneni iba tzünokdang ajanga Siang belt nung alinük melenshitsüba tebilemtsü lemsatepa liasü.
Iba project ya Siang Stage-II tesem nung yanglutsü asoshi benokdanga lir, aser iba ya taoba mapang nung Stage-I aser Stage-II ta project balala ana inyaktsüba benokdanga aliba toktsür single storage project ka ama dang yanglutsü.