Siberia: Russia tayimtsü ka tsükok; 15 tsükset

Russia kübok Krasnoyarsk region nung tentetba Igarka jila anasa Mi-8 helicopter tayimtsü ka tanü Brehostibar nü tsükokba sülen ketdangsertem lendong atalokdak mapa inyakba noksa nung angur. (Igarka, November 26)

 Moscow, November 26 (Agencies): Russia nunger helicopter tayimtsü ka Siberia nung tanü Brehostibar nü tsükoka lendong atalokba osang ka sorkar ketdangsertemi metetdaktsüogo.

Tanü tayimtsü tsükokba lendong nung ishiba agi nisung 15 tashi tsüksetba osang tang tashi nung jangjaogo ta parnoki ashi.

Nija teloki ketdangsüa nüburtem tesem ka nungi tesem tanga kati anir senzüdaktsüba Mi-8 helicopter tayimtsüji Moscow yimtiba nungi northeast tsütsüleni kilometer 2,800 shi pilar West Siberia kübok Igarka jila nung tsükok ta parnokisa shisem.

“Tanü tsükokba tayimtsüi tayimtsü ketdangser 4 densema ajak agi nisung 26 tashi anir liasü aser tang tashi nung parnok 15 tsüksetba aser nisung 11 yirua tang mozükidang anepalua aliba osang jangjaogo,” ta regional transportation ketdangsertemia metetdaktsü.

Totzü tutetdak ka bushia apusoba tayimtsüi Igarka airport toktsür minute 15 sülenbo tayimtsü den tongtepratep mesüteti aküm aser tesülen iba tayimtsü tsükokba osang angazük ta parnoki ashi.

“Tanü tayimtsüi ajungbena ali nung anenzüktsü merangdang lendongji ajuru,” ta Russia’er emergency ministry-ia metetdaktsü.

Ajisüaka, kechi timtem ajanga tayimtsüji tsükok iba osang tejangjaba ministry-i memetetdaktsü.