Sibsagar Press Club silver jubilee nung Nagaland nungi osangzülurtem aden

Mokokchung, Rongchii (April) 7 (TYO): 1993 küm Sibsagar Press Club (SPC) tenzüker küm metsür pungu (25) ajungba nüngtem nung parnoki küm piyong sentong tapu balala inyaka arur külen tatemsabuba jubilee sentong tuluka ka Sibsagar jila Thaneshwar Dutta Memorial Hall nung ayongzüka mungogo.
Iba sentong nung Assam kübok aliba district balala nungi press club balala den temenungratsüka Sibsagar Press Club mezüng tenzükertem, taoba mapang club tenzüka arurtem aser Nagaland Press Association (NPA) nungia osangbenertem densema shilem agia liasü.
Iba sentong nung tetushi tesemdanger Nagaland Press Association (NPA) tir, K. Temjen Jamiri jembidang, Assam aser Nagaland nung aliba media-tem tesendaktep tajung akatsü asoshi kati ka metettepba den mapang shia ajurutepa sensaksem akatsüla, iba ama sensaksem akaba ajanga state ana tsüngda tebilemtsü keno balala alibatem angatetteptsü aser nüburtem putepa alitsü imlar, ta ashi.
Assam aser Nagaland state ya akhi nungi kidanger süa aru aser kidanger dang alitsü, anungji, taoba mapang koda tesendaktep tajung nung arudar yamaji aotsübaji kanga tongtibang lir, kechiyong putepa aser tesendaktep junga ayuba dak alaka asenok asoshi tanga lenmang mali, ta paisa ashi.
Assam o Nagaland na mapang kar nungbo keno kar nung tebilemba balala asütsüa akok, iba tensa nungji state ana nungi media-temi apu latsür ka ama item kenotem angatetteptsü asoshi tongtibang süa inyaktsü asoshi paisa tayongzükba ka agütsü.
Assam aser Nagaland dang masü saka region nung aliba osangzülurtem ajak ka küma lungjemtsüla, tanü Northeastern region nung nüburtemi nüngdakbaji yimjung aser terenlok lir, aji asünung dang nüburtem yimjiyimjung nung alitsü aser yangji osangzülurtemi shilem tulu agitettsü, ta paisa inyakdaktsünüba o ka shisema liasü.
Iba sentong nung Sibsagar Deputy Commissioner, Pallavh Gupal Jha IAS den lokti balala nungi ketdangsürtemi mapang tatsütsü agia jembi. Sibsagar Press Club mezüng tir inyaksang Jyoti Prasad Chaliha-i SPC jubilee nüngtem nung adokba nüngo kaket ka sayatsü.