SIC Nagaland-i Lekieram yimtsüng lapoktsü

Dimapur, Rongchii/April 30 (TYO): State Information Commissioner Nagaland, Geulia Ramlia-i April 30, 2019 nü Lekieram yimtsüng lapoktsüogo. Pa den külemi ADC Jalukie Tinojongshi Chang, SDO (Civil), EAC Jalukie aser sorkar ketdangser aser lokti lenirtem iba sentong nung dena liasü. Sentong nungsa kidanger yimtsüngtem nungi chairmen temi anir lenirtem dena liasü.
O jembiba mapang SIC-i yimdaklir aser lenirtem dang official inyakyim balala atema mezüngbuba yimtsüng atema code number balaka bushitsü ashi. Paisa, iba yimtsüng tasen nem takok tashi teyari agütsütsü nangzükba den yimtsü arrtsü jung junga lateta ayutsü, Village Council züngsem shimtsü aser tetenzük nungi tongtibang kuli kakettem bendena ayutsü ajungshi.
Ramlia-i ashiba agi, Lekieram yimtsüng ya Peletkie yimtsüng nungi jakzükba lir aser iba ya District kübok yimtsüng tejentiba lir, kong IB Bungalow tang tashi meraksai amendaka lir. Paisa, yimdaklirtem dang pei poksüng asoshi maneni bendanga agüja meranga inyaktsü ajungshi.
Yimtsüng lapokba sentong ya Hangtube lenisüba kübok aka aser Lekieram yimtsüng VDB Secretary-i tepela o jembia liasü, ta DPRO Peren sangdong ka ajanga metetdaktsü.