Siddhartha Bhattacharya-i TET tesayurtem den ajuruteptsü

Guwahati, June 19 (Agencies): Assam nung TET qualified tesayurtemi lungkak aitaka State Education Minister Siddhartha Bhattacharya-i ashiba agi pai regularization atema takhangba agütsüba tesayurtem den dang olemteptsü ta ashi.
June 28, 2019 nü Minister Bhattacharya-i TET qualified tesayurtem den senden ka amentsü ayongzüka lir.
TET certificates indang mapang apuloktsütsü aser TET qualified tesayurtemi TET examinations tanaben magütsüshitsü, ta paisa ashi.
“Ni jangjajangja shiogo. Tesayurtemi kaketshirtem temeten anema inyakra, odangbo meyutsütsü. 2012 nungi TET examination magidangi lir. TET certificate indang kümsükji küm 7 lir. Mapa teinyakdak purtem maneni inyaktsü saka kari tanga mapa inyaknüra, parnok ket nung qualification alitsüla” ta Bhattacharya-i osangbener dang ashi.
Sarba Sikhsa Abhijan Mission, Assam kübok tesayur 12000 tashi contractual posts nung anioka liasü.
June 18, 2019 nü Assam nung contractual TET qualified tesayurtemi All Assam Primary TET Teachers Association kübok state ajungalen lungkak aitba sentong ka agi. Parnoki mapa regularization asütsü takhangba agütsüba aser State Education Minister Siddhartha Bhattacharya-i ‘driving license’ olen jembiba aija lungkak aita liasü.