Sidhu Congress nung denogo, Amritsar nungi tokteptsü

New Delhi, January 15 (Agencies): Punjab assembly election agitsü mapang ana nung lia Deobarnü taoba mapang asemben tashi MP, Navjot Singh Sidhu-i Congress party lenir, Rahul Gandhi ajurua senden amenba sülen party nung denogo.
Taoba mapang cricket asayar, Sidhu-i Amritsar constituency nungi tokteptsü; 2002 aser 2014 küm iba menden nung pai BJP nungi toktepa takok ngua liasü.
Tanü densembo pai Rahul Gandhi asemben ajurua senden menogo.
Tanü sangdong ka ajanga Congress otongdar, Randeep Singh Surjewala-i, “Pai (Navjot Sidhu) odiodia jembiba, pa dak linük atema tangatetba tajung aliba aser asayamenü aliba sempettem ajanga Punjab nung Congress party kanga tashi itshitsü ta onoki amanger,” ta metetdaktsü.
Arishi küm 53 Sidhu-i nübo jenti ayongteter, aser ibaji ajanga Punjab nung Congress-i Akali Dal aser AAP den toktepba nung kanga yaritsü südi.
Punjab nung February 4 nü assembly election agitsü.
Brihostibarnü Congress-i candidate tenüng 23 sangdongdang Amritsar (East) assembly constituency atemabo tenüng mesangdongi liasü, koba ajanga iba menden nung Sidhu-i tokteptsü südi ta bilema liasü.
Yaküm November ita nung pa kinüngtsü, Navjot Kaur Sidhu-i BJP toktsür Congress nung dena liasü. La ya taoba mapang Punjab sorkar nung Chief Parliamentary Secretary inyaka liasü.
Yaküm September ita nung Sidhu-i BJP toktsü aser Rajya Sabha nungi anena liasü.
Iba mapang nungji pai, BJP-i pa ‘tebor tajung oset ka’ ama amshir aser Punjab nungi tokteptsü nokdanger ta aija liasü.
Yaküm pai AAP nung adentsü atemaa jembia liasü, saka telemtetba tajung ka dangi maruteti toktsü.