Sidhu-i party tasen ka tentettsü

Chandigarh, September 02 (Agencies): Taoba mapang BJP lenir, Navjot Singh Sidhu, shibai tawa Rajya Sabha menden tokja liasü, pai Akali lenir ka densema yimtenren party  tasen, ‘Awaaz-e-Punjab’ tentettsü.
Osangbenertem den jembidang Akali Dal party nungi jendoksang, Pargat Singh-i, “Punjab raksatsüba party tem anema raratsü atema onoki front tasen ka tentettsü telemtetba agiogo. Taruba anogo asem-pezü tsüngda front tasenba indang sangdong ka agütsütsü,” ta metetdaktsü.
Osang ajanga angazükba agi, Sidhu-i kar den party tasen ka tentettsü bangjemogo aser Jalandhar nungi Alkali MLA, Pargat Singh aser Ludhiana nung Bians adianutem- Simarjeet Singh Bains aser Balwinder Singh Bains nunger den senden ka menogo. Tenaprongla ya Independent MLA lir.
Taruba Punjab election nung AAP-i tang sorkar tashi nung aliba Akali-BJP teloktep aser Congress den tokteptsü renemba mapang ka nung Sidhu-i party tasen ka tentettsü osang jungkai adokba ajanga AAP kanga aoksaogo, kechiyong pai BJP toktsür AAP nung adentsü atema tejembidak liasü.
August ita nung Sidhu-i AAP tongti lenir aser Delhi Chief Minister, Arvind Kejriwal ajurua pa AAP nung adentsü atema jembia liasü. Iba sülen August 19 nü Kejriwal-i, cricket asayar nungi yimtenren nung ajemoksangi mapang nüngdaker, ta metetdakja liasü.
Tanü Sidhu, Pargat aser Bains adianutem külemi tangokba noksatem front lenirtem kima maa liasü, aser parnoki teimla atema longjemogo, ta ashi.
“Punjab raksatsür party tem anema onoki raratsü,” ta parnoki poster nungji shia lir.
Osangbenertem den jembidang Ludhiana South nungi Independent MLA, Balwinder Bains-i, “Onok longjemba nükjidongji Punjab state ya temesepba mozü tebilemtsü aser state nung nisung tamajungertem yimsüsüba nungi kümzüktsü atema lir,” ta ashi.
Taoba mapang Hockey Olympian aser Punjab nung Sports Director, Pargat-a tamalenbo AAP nung adentsü südi ta bilema liasü.