SIFF nung Sultan Best Action Movie award nguogo

Mumbai, June 25 (Agencies): Salman Khan-i shilem agiba film Sultan Shanghai International Film Festival (SIFF) nung Best Action Movie award nguogo.
Shanghai International Film Festival amongba mapang Jackie Chan Action Movie Week ajanga China nunger aser Asia Pacific nungi action actor kati special effect amshiba aser shilem agiba dak rangloker actor tem shimer.
Iba sempet ya Yash Raj Films (YRF) tenüng nung Shanghai nung Consul General of India Prakash Gupta-i agizük, ta osang ka ajanga Honibarnü metetdaktsü.
“SIFF ajanga onok nem temeim aser akhümtsübu agütsüba atema onok kanga pelar. Action category kübok Jackie Chan nungi iba award agizükba ya kanga tongtibang aser jangratemtsüka lir. Tanur asüdang nungi kü atema aser India nunger aika atema action stars rongnung tesaputibaji paa ka liasü aser pai kanga ajungmesogo. Sultan ya Indian wrestling indang film ka lir. Martial art film tajung aika rongnungi iba film shimtetba ya kanga jangratemtsüka lir aser iba ajanga action dak ajemdaker otsü tajung ashiba film ya ajaki reprangner,” ta film director Ali Abbas Zafar-i ashi.
YRF, International Operations, Vice President, Avtar Panesar-i ashiba agi, “Sultan ajanga India nunger indang action atema jenjang tasen ka lapoktsüogo. China nungeri iba ya sapuba ya kanga jangratemtsüka lir aser Jackie Chan Action Movie Week nung temaba sempet ngutetba asoshi onok kanga nüma danga bilemer.”