Signal, Thahekhu nung school anasa aliba dokantem nung moko mita ao

Dimapur, Aami/June 06 (TYO): Aami/June 05, 2018 nü Dimapur kübok Signal aser Thahekhu kiyongtem nung school anasa aliba dokantem nung moko chiyungtsütem mita ao, aser iba mapang nung dokan 11-i Section 6 (b) ozüng alema inyakba atema dokan kiburtem nem temerenshi agutsü.
Sub-urban Police station Dimapur nung DSP Probationer in Charge, Jonny Patton leniba nung school anasa aliba dokantem mita ao, aser iba dak sendakba nung National Tobacco Control Programme (NTCP) Nodal Officer, Dr. C. Tetso-i, Patton ama lanur officer tajung ajanga COTPA 2003 nung aliba ozüngtem junga benoka inyaktettsü, ta ashi.
COPTA 2003, Juvenile justice (Child care & protection) Act aser Legal metrology Act kübok moko azüokba ozüng tesashi aika lir, ajisüaka tang tashi item ozüngji junga benoka meinyakteter, ta pai ashi.
Tetso-isa, “Ozüng benokba agency temi tobacco control laws junga benoka inyaktsü nüngdak; ibaji ajangadang loktiliba nung moko dak sendakba tashidak khuret pungbatsü,” ta pai ashi.
Paisa village councils danga peipei yimtsüng temeket nung school anasa aliba dokantem nung moko agi yangluba chiyungtsütem ayokba mita aotsü ayongzük.