Sikkim: Bendanger tenokdangba aginogo

Gangtok, Aami (June) 5 (Agencies): Bendanger Sikkim semdangertemi nem Gurudongmar awatsüng aser North Sikkim nung tesem balala semdangtsü asoshi temelaba agütsüogo, koba tang tashi temelaba magütsüi aruogo. Iba jenjang agiba ajanga Himalaya tenemtsüng nung aliba state ya bendanger raliwalirtem aikati semdangtsü imlar.
Union home aser defence ministry ajanga temelaba agütsüba sülen arrtsü nung aliba tesemtem ya bendanger raliwalirtem nem semdangdaktsütsü asoshi lapoktsüogo.
“Onoki Centre nungi tenokdangba agütsür aliba agintsü asoshi temelaba agütsüba osang angazükogo. Onoki Aami (June) 6 nü iba dak sendakba nung state home department den senden ka amentsü aser official sangdong ka metetdaktsütsü,” ta state tourism department, secretary, C. P. Dhakal-i ashi.
Bendangertemi Sikkim semdangtsü asoshi Restricted Area Permit (RAP) aser Protected Area Permit (PAP) agizüktsü nüngdaker. State ya security tsütsü kanga dang sensitive tesem ka ama züngshir kechiyong iba ya China, Nepal aser Bhutan-i meketa lir.
Bendangertem North Sikkim kübok Thangu adena aotsü memelar. Tang tenokdangba aginba sülen parnoki Gurudongmar awatsüng semdangtettsü, ajisüaka East Sikkim nung Nathu-la pass bo mesemdangtettsü.
Taoba küm bendanger 50,000 shi-i Sikkim semdangogo aser kasa mapang nung domestic tourists lakh 14-i state semdangogo. Taküm state ya raliwalir lakh 20 shi-i semdangtsü imlaa atatar.
“Bendangertem atema tenokdangba aginba sülen asükwa aser autumn mapang bendangertem tali arutsü. Maneni kidanger Darjeeling hill nunga mepetmesü mali anungji raliwalir tem timba akümtsü,” ta tourism department ketdangser kati ashi.