Sikkim nung Congress-i ECI anema by-election nung shilem magitsü

Gangtok, September 20 (Agencies): Election Commission of India (ECI)-i Sikkim Chief Minister PS Tamang nem by-election nung tokteptsü temelaba agütsüba Congress party-i aitsüogo.
By-election atema BJP aser SKM tsüngda tesentaktep yangluba osang sangdongba sülen anogo ka lir ECI-i iba osang metetdaktsüogo, anungji iba ya tebilemtsü tulu ka lir, ta Congress-i ashi.
“Constitution kümzüka mali ama repranger. CM Golay indang ken o Supreme Court-i angadangdang, anungji kodaser ECI-i pa metentsür?” ta Sikkim SPCC president Bharat Basnet-i asüngdang.
Tim masüba inyakyim nung ajemdaker Indian National Congress state unit-i Sikkim nung constituency asem by-elections nung shilem magitsü telemtetba agiogo, ta pai ashi.
Sikkim nung regional party tem- SDF aser SKM-i teti nübortem ashioktsür aser Sikkim-i BJP anir aru, ta Basnet-isa ashi.
PS Tamang ya ochimashi ken o ka nung aija liaka Governor Ganga Prasad-i pa Sikkim CM inyaktsü shimbaji khenyongi meshitak lir, ta paisa shisem.