Sikkim nungi tetsür ka Delhi nung tebur asem dang ayok

Gangtok, Monupii (May) 4 (Agencies): Delhi nung mapa agütsütsü tenangzükba nung anir or arishi küm 19 tetsür chanu ka tetsür ka tenüng agi Monika Tamang-i tebur asem dang ayok.
Tanutsüla ya West Sikkim kübok Gelling Samsing tesem nungi lir.
Police sangdong ka ajanga ashiba agi, tetsür chanula aser Monika na ya Jorethang tesem nung Aenjeti (January) ajurutep aser Delhi nung la nem mapa agütsütsü tenangzükba nung anir ao. Ajisüaka tetsür chanula tsürapurnem iba osang ya magutsü. Delhi atongba sülen tetsür chanula ya Saket tesem nung shiba ayu aser Sameer, Anup Gupta aser Omkar Chettri nungeri la ya Monika Tamang-i parnok dang yokogo ta shia, tashiyim agi shi nung aiben medem aser ibaji dang masü la dak parnoki teka dena sangshia merenshi.
Chettri ya Siliguri kübok Bhaktinagar tesem nung alir.
Tetsür chanula ya tesem tanga kati belener aoba sülen anogo ka lir la jentet aser iba osang ya Noida Sector 39 nung police tem nem metetdaktsü.
Iba tatalokba dak sendakba nung U/S 370 IPC, R/W SEC. 5 OF THE IMMORAL TRAFFIC (PREVENTION) ACT, 1956 kübok Jorethang Police Station nung ken o ka benokogo.