Sikkim sorkar mapa inyakertem anogo 5 dang mapa inyaktsü

Gangtok, May 28 (Agencies): Sikkim nung Chief Minister tasen Prem Singh Tamang (PS Golay)-i Hombarnü state sorkar mapa inyakertem hopta nung anogo pungu dang mapa inyaktsü osang metetdaktsü.
Chief Minister akümba sülen PS Golay-i Tashiling state secretariat nung tongti sorkar ketdangsertem den senden amen.
Sikkim nung sorkar mapa inyakertem hopta nung anogo pungunü dang mapa inyaktsü, ta senden amenba sülen Golay-i osangbener den jembidang ashi.
“Onoki election mapang sorkar mapa inyakertem anogo 6 nungi pungu ajemtsütsü nangzükba mapa küma inyaktsüogo” ta paisa ashi.
Sorkar mapa inyakertemi sodi anogo ka talila angutsü aser ibaji pei temang aser kinungertem anepaluba nung endoktsü akok, ta Golay-isa shisem.
Pai anir minister aser MLA temi Fortuner SUVs melena Scorpio garitem dang amshitsü ta chief minister-isa metetdaktsü.
“Tang atemabo onoki Fortuner SUVs amshitsüsa akümer, saka kobi melii Scorpio garitem ang amshitsü” ta Golay-i ashi.
Taoba chief minister P K Chamling-i anir SDF sorkari public sen tim mesüi amshi, ta paisa tai tongloktsü.
Scorpio ama jenjang tasak masüba garitem amshiba nungi anüngzükba senji Sikkim nung alirtem atema amshitsü, ta paisa ashi.
Sikkim chief secretary, additional chief secretaries, principal secretaries aser heads of department den senden amendang chief minister Golay-i amalitepa mapa inyaktsü aser state o nübortem ajungkettsü atema külemi yaritepa inyaktsü ayongzük.
“Sorkar ketdangsübaren nung alir ajak kibong ka ama inyaktsüla aser kati ka yariteptsüla. Taoba sorkari “good governance” tenzüka yutsüba maneni inyaktsü aser elections nung Pawan Kumar Chamling den rarabaji tangatetba nung ajemdaker raraba liasü. Ozü sorkari state ketdangsütsü atema pa (Chamling) dang nungi shisatsü agitsü,” ta paisa metetdaktsü.
Paisa chief secretary, director general of police (DGP) aser ketdangsertem dang tensa süngjema ayutsü atema inyaktsü tetuyuba agütsü aser party mereprangi teinyaktsü tim inyaktsü atema ashi.
Hombarnü Paljor stadium nung SKM lennir arishi küm 51 tain PS Golay-i Sikkim nung chief minister trokbuba inyaktsü atema tezüngzüktep agi.
SKM ya 2013 küm tentet aser taküm elections nung parnoki züngsem 32-i akümba Sikkim Legislative Assembly nung menden 17 nung takok angu.
Pawan Kumar Chamling-i aniba SDF sorkari tesüiba küm 24 tashi atongtepa sorkar ketdangsüa aru.