Sikkim ya raliwalirtem asoshi tesem tajung ka kümtettsü : Mahesh Sharma

Gangtok, Oct.15 : India nung Sikkim ya raliwalirtem (tourists) amongdak tesem tajung ka kümtettsü aser iba jagi linük rongsenren nung tuluka yaritettsü ta minister of State (Independent Charge), Culture & Tourism Mahesh Sharma-i metetdaktsü.
Pai iba o ya Gangtok nung tanü Brehostibar nü 4 buba International Tourism Mart sentong lapokja jembidang metetdaktsü. Iba sentong nung Sikkim Chief Minister Pawan Chamling dena liasü.
Sikkim ya raliwalirtem amongdak tajung ka kümtettsüsa alinungji, sorkari akok tashi melamelaa oliora sütettsüsa lenmangtem lapoktsütsü ta paisa ashi.
Mahesh Shrarma-isa ashiba agi, center sorkari Northeast nung nübortem asoshi highways aika yanglutsü aser train lenmanga tajungba küma lapoktsütsü.
” Asenoki alima tesem balala nungi aruba raliwalirtem 1% arudaktsütetra, iba jagi linük GDP nung 8% – 9 % tashi rongsenren nung renlokdaktsütettsü,” ta paisa ashi. Paisa Northeast nung terenlok mapa inyaktsü asoshi center sorkar nangzükbatem indang jembidang, Gangtok nung tayimtsü anendak December 2016 tashi nungbo renemtsü ta metetdaktsü.
Northeast state-tem ya raliwalirtem asoshi tongtibang tesem ka dang masü saka ano anü tashi atsüzüka amshitsü asoshi Northeast nung yimti trok shimteta lir. Iba “Development of Solar Cities Programme” nung shimteta aliba yimtitemji Assam nung Guwahati o Jorhat na, Nagaland nung Kohima o Dimapur na aser Arunachal nung Itanagar aser Tripura nung Agartala alitsü.