Silchar airport nung TMC lennirtemi achiajemtsü agütsüba magizük

Silchar, Luroi (August) 3 (Agencies): Brihostibarnü Trinamool Congress lennirtem Silchar airport nung arrla 151 kübok preventive detention nung ayu.
Yashi TMC lennirtem Silchar tonga aruba sülen police den mangatettep adok aser ibaji yasüng tashi liasü. District administration-i parnok nem achiajemtsü agütsü saka ibaji magizük aser parnok sasa dang chiyungtsü alia achi.
Yashi nikongtsütsü medical team ka tayimtsü anendaki parnok anepalutsü atema yok saka TMC züngsemtemi medical check-up asütsü memulung.
West Bengal nung Urban Development Minister Firhad Hakim-i yasüng pa aser par külem züngsemtem atema achiajemtsü ali.
Tanü Trinamool Congress lennir 6 Kolkata-i meyipa aotsü liasü saka iba mapangjia mangatattep adoka raratep.
“Tanga passenger 77 tashi tayimtsü anendak adena yok saka onokbo noktang. Police ketdangsertemi onok dang CrPC 144 ozüng agüja lir ta ashi aser iba jagi onoki kimai meyok, saka onok Silchar nung lokti sentong nung medendaktsütsü atema dang iba ozüngji yanglu ta jungkai adoka sayur” ta Raiganj nungi Member of Parliament, Arpita Ghosh-i ashi.
Iba ajanga Assam nung sorkari tashiyim mapa inyakba sayur aser ibaji onok noktangba ajanga atishia sayur, ta laisa ashi.
“Yasüng yipden asemsem aliba takdang ana nung onok anenzük, saka mapang talangba ka onok tetsür police constable temi nüka lounge nung mejangi moi kazü” ta laisa shisem.
Brihostibar aonung 10:00 ako meta police ketdangsertemi Trinamool MP temji guest house kati anir aotsü merang, saka Trinamool lennirtemi memulung.
MP Arpita Ghosh den Trinamool Congress lennir Mamata Bala Thakur na tanü Delhi-i meyipa ao aser lai ashiba ashi, Silchar nung yashi aser tanü atalokbatem ajanga tarutsü anogotem tetsükdaktsü bentsür arutsü.
Silchar nungi MP aser All India Women Congress President Sushmita Dev-a kasa tayimtsü nung Delhi-i ao. Lai osangbenertem dang “Tanü ni Assam Chief Secretary T Y Das den jembi aser Cachar district nung tensa junga dang liaka kechiba arrla 144 ozüng agütsü ta asüngdang” ta ashi.
Lar constituency semdangi aruba aienertem menokdangtsüba liasü, ta laisa ashi.
Anogo ananü tashi arrla 144 ozüng alitsü agütsüba mapa tembanga sülen Additional Director General of Police (Law & Order)-i nisung ajak dang pelaba metetdaktsü aser NRC maparen inyakba mapa tensa meraksadaktsütsü atema merangtsü ta paisa shisem.