Silchar nung nisung 2 menüngsetba sülen Section 144 ozüng agütsü

Guwahati, November 1 (Agencies): Assam kübok Silchar nung ketdangsertemi Section 144 ozüng agütsüogo. Bodbarnü gari lendong ka atalokba sülen tensa mejungi akümba agi iba ozüng agütsü.
Meherpur nung Kali Puja tzü nung endoki aodang truck gari kati tetsür ana menüngsetba anema nisungtemi lungkak aiter. Bodbar nikongtsütsü atalokba lendong nungsa nisung 23 yirua liasü.
“Olulu azüoktsü, ozüng timi ayutsü, nübortem lendong nungi kümzüktsü aser telok balala tsüngda rara madoktsütsü atema iba ozüng agütsür” ta Cachar district magistrate Laya Madduri-i ashi.
Netaji Subhas Chandra Bose indang kürakyanglu anasa Rangirkhari tri-junction nung lungkak aitdang lenmang ajunga mokdang aser tesem balala nung lung agi ona raraba osang lir.
Mejangjaba nisungtemi ASTC bus kari ka den tanga gari ka raksatsü.
Kali Puja tzü nung endoktsü atema aodang truck gari ka kanga karaa arur tetsür ana menüngset aser nisung aika yirutsü. Iba atema tejashi nung nisungtemi truck gariji rongdoktsü aser lenmang mokdang. Iba lenmang yagi Silchar Medical College Hospital den sendakteper.
Aonung 11:00 ako matongdang ‘no-entry’ liaka kodaser truck gariji jila telungi ait ta nübortemi asüngdanger.
NH-306 (Silchar-Aizawl Road) ajanga ganja abenba truck gari ka Silchar leni aodang Aulia tesem nung nisung ka dak atsük. Idangji nisungtemi truck gari sülen ardak aser iba jagi kanga dang tekaraba nung ‘no-entry’ tenokdangbatem alema Meherpur leni ao. Aonung 8:15 ako meta police-i truck gari aputsü atema arshi aser idangji Kali Puja sentong nung adenertem dak menüng, ta police ketdangser kati ashi.
Iba sentong nung tanur-tain ajak meyokteper nisung 150 shi liasü, ta osang ajanga ashi.
Lendong atalokli teyirurtemji Silchar Medical College Hospital-i anir ao. Mozü kidang Durgapally nung alir Pompa Dey (20) aser Sonali Das (18) na asü.
Iba sülen nisungtemi truck gari nung mi senoktsü aser mi ensepba gari tonga arudang nisungtemi lung agi ona noktang. Parnokisa Rangirkhari police outpost nung officer-in-charge indang motorbike rongdoktsü.
Police-i truck gari driver aser assistant driver puogo aser police anati mapa shitak meinyakba atema mapa nungi anentsüogo, ta police ketdangserisa ashi.