Silchar-Sylhet bus service yakta tenzüktsü

Silchar, Yimpoksüi/November 21 (Agencies): Silchar aser Sylhet na tsüngda bus service yakta tenzüktsü imlar kechiyong Bangladesh transport ministry-i iba onük ka kanga tongtibangsa benoka inyaksangshidar.
Iba olen ya Bangladesh, Assistant high commissioner, Dr. Shah Muhammad Tanvir Mansur-i Bodhbarnü Silchar semdangba mapang ashi.
Dr Mansur-isa, Central Jail, Silchar semdanga jail nung aliba Bangladesh nungertem jenjang asadangogo.
Jail kima osangbenertem den snsaksemba mapang Dr Mansur-i ashiba agi, “India aser Bangladesh na tsüngda ali, tzüyim aser anung nungi tesendaktep yanglushitsü atema diplomatic level temaba nung jembishinüdar aser iba ya tang aliba sorkar inyakyim tongtiba rongnung ka lir.”
Paisa, “ni jail semdanogo aser Bangladesh nunger shirnok tepuokdak mapa tembanger linüki meyipa aotsü jangrar, parnok jenjang asadangogo,” ta ashi.
Northeast Now den sensaksemba mapang pai, “onoki nisung tenet jangjaogo aser onok home ministry-i parnok maitsü jangjashiba sülen takaratiba nung anir aotsü,” ta ashi.
Assam nung National Register of Citizens (NRC) indang asüngdang dang Dr Mansur-i, “ni linük ana tsüngda rongsenketsü aser sobaliba tsütsü ken o tem achaayangba ketdangser ka lir. Ni iba tasüngdangba langzütsü temelaba agüja mali,” ta langzü.
Assistant high commissioner Mansur, nikongtsütsü book fair ka nung aden aser Bangladesh o iba tesem na tsüngda mapang talangka nungi tesendaktep nung aruba dak sendakba nung pa tebilemba lemsatepa liasü.