Silicon Valley Classic: Venus quarter nung tsükogo

Luroi/August 04 (Agencies): Silicon Valley Classic tennis asayamung tetsür kija quarter-final asaya nung America tsür Venus Williams-i Greek tsür Maria Sakkari den 6-4 7-6(2) agi tamakok ngua asyamung nungi tsükogo.
Quarter-final asaya mezüngbuba aser tanabuba set nung arishi küm 38 tain Venus-i 3-0 aser 5-3 agi Maria tejaklen liasü. Ajisüaka, Venus dang nungi küm 15 agi tanutsü Maria-i kanga dang toktepa asaya takok ngutet.
Venus-i taküm küm Metsüremi/March nungi asayamung balala nung shilem agia arudar aser lai tang tashi nung asayamung indang round tasembuba ka danga koktetta mali. Taoba küm 2017 Grand Slam asayamung final ana tashi nung Venus-i asayaogo aser takümbo iba amala asaya yimya aser sempet tem lai amshiba mengudang.
World No.49 nung alila Maria Sakkari-i iba asayamung nung set ka nung danga tamakok mengui la indang mezüngbuba asaya asem tashi nung takok ngua asaya arudar.
Iba asaya nung Maria-i ghonda ka sür minute 43buba nung Venus madak takok angu. Iba den külemi Maria-isa tanabuba set nung set point ana tashi ngua asyaogo.
Maria-i America tsür Danielle Collins den semi-final asayatsü jangjaogo. Quarter-final asaya tanga ka nung Danielle-i taoba World No.1 nung alila Belarus tsür Victoria Azarenka den asaya liasü. Tena tsüngda asayaba mapang Victoria-i mezüng set tiebreak nung koker tanabuba set asayaba mapang 3-0 agi Danielle tejakdang liasü. Tia makai Victoria temang nung timtem aliba ajanga mesayatettsüsa kümadok. Iba yongji Danielle-i asaya koktetta tembang.
Taküm küm asayamung balala asaya aruba Danielle Collins-i semi-final tongtetba ya la atema tanabuba asütsü.
Kasa asayamung quarter-final asaya tanga ka nung seed pezübuba nung alila Belgium tsür Elise Mertens-i British tsür
Johanna Konta madak 7-6(4) 6-3 agi takok nguogo.
Johanna-i iba asayamung nung kanga junga shilem agia tenzük. Alima ajungai süngmangtsüsa Sangtennü/Tuesday Johanna-i grand slam 23 ben tashi takok angula America tsür Serena Williams madak 6-1 6-0 agi takok ngua lir. Serena-i tennis asaya aruba ajunga nung kanga dang mejungi tamakok angubaji iba asayamung nung Johanna madak tamaokok angubaji asütsü.
Johanna-i Elise den asayaba mapang kasa sempet ji mamshitet. Ajisüaka, la (Johanna) tamakok mangudang mezüngbuba set asaya nung point 5-2 agi Elise jakdang asaya liasü.
Elise Mertens-i taküm küm tenzüker asaya aruba nung asayamung pezübuba koktettsü atema meranga asaya arudar. Seed pungububa nung alila Romania tsür Mihaela Buzarnescu den Elise-i semi-final asayatsü jangjaogo.