Silva Manchester City nungi asayatsü

May 27, 2017 (Agencies): Portugal nunger playmaker Bernardo Silva French champions Monaco nungi Manchester City den July 1 nü nungi tenzüka adentsü, ta English Premier League club ajanga Hokolbarnü metetdasktsü.
2017/18 atema Silva ya nüngtugu asayar rongnungi Manchester City atema manager Pep Guardiola-i mezüngbuba aliba asütsü.
City puri pa aliba sen jenjang mesüra pa iba club nung küm kwi atema asayatsü ali item osang tejangja magütsü, saka osang ka ajanga ashiba agi, arishi küm 22 tain asayar ya million £43 million ($55 million, 49 million euros) shi agi ali südi.
Silva alitsü asoshi Manchester United pura tejangraba liasü saka pai city nungi asayatsü asoshi shimtet.
“Alima nung club tajungtiba ka nung asayatsü asoshi maongaka anguba atema ni kanga pelar,” ta Silva-i City website nung ashi.
“Ni iba telok nung shilem ka asütsü asoshi maongka anguba atema kanga pelar aser team pur nükjidong tongtettsü asoshi ni akokba tashi tajungtiba asayatsü merangtsü.
“Guardiola kübok angazüktsü asoshi shibai ma ta ashitsü. Pa alima nung coach tem rong nung tajungtiba mesüra tajungtiba rongnung ka lir. Pai Barcelona aser Bayern Munich nung inyakba asenok ajaki meteta lir, aser pai iba club nunga takok marok aika abentsü ta imlar. Pa den külemi inyaktsü asoshi maongka anguba atema kanga pelar,”ta paisa ashi.
Premier League champions Chelsea kübok parnok tasembuba jenjang nung tembangba sülen Guardiola-i tawa ang club nungi tejen asayar winger Jesus Navas aser defender Gael Clichy na doktsüogo.
Navas aser Clichy na den külemi goalkeeper Willy Caballero aser Bacary Sagna na dena doktsüogo. Parnok den külemi Pablo Zabaleta-a doktsütsü liasü, shiba West Ham nung Hokolbranü denogo.