Simon Cowell arishi küm 95 tashi alitsü ta ashi

September 26, 2015: Kentenba business nung kibur Simon Cowell-i ano ‘X-Factor’ nung küm 40 tashi tetendangtsü kechiba süra pa arishi küm 95 tashi alitsü ta shiogo.
Cowell-i, “Kanga dang tashi tait (high tech) DNA tendangba sülen Los Angeles (LA) nungi doctor kati ni arishi küm 95 tashi alitsü shinzüktsü,” ta Daily Mail den jembiba mapang ashi.
“Tia makai asüng bus gari ka agi tsüksettsüa akok saka kü dang ni arishi küm 95 tashi alitsü ta ashiogo. Ni bilemer mapang bapikaji alibaji oda alima nung telishi asütsü,” ta pai ashi.
“Doctor-i iba osang ashiba sülen nungi ni asoshi kibong ka nüngdaka kümogo aser anibelem nungia jenbua alitsüla. Mapang talangka mazüngi dang aliba ajanga tangbo joko kü sasa anibelem azüokteta kümogo,” ta paisa ashi.
February 2014 nung Cowell aser tetong Lauren Silverman na jabaso, Eric agi sosema lir.
Arishi küm 55 tain, Cowell-i anogo nung cigarette 20 achir, saka temulungjang, tepokpok aser, azü tendangba nung iba jagi kecha timtem agüja mali, ta pai ashi.
“Doctor kati kü temang tendangba osang metettsü kanga yongseta liasü, saka iba tendangba nung tamajung kecha madok,” ta Cowell-i ashi.
Mapang talangka shiranga lir külen July ita nung tetsü asüba sülen pai DNA tendangtsü kanga jangra bilem.
Tetsü asüba indang jembiba mapang pai, “Ni anogo shia ketsü bilema arur. Ni anepdang sak shia la bilemteter. Ni kü phone angudang la dangi call sünüa aiter. Gari anir jajadanga la dang bilema anir,” ta ashi.