Simona Halep China Open tanabuba round nung tsükogo

Beijing, Rongjui/September 30 (Agencies): Tang tasayadak China Open tetsür kija asaya nung Simona Halep Hombarnü Russia tsür Ekaterina Alexandrova-i tsükdaktsüogo.
Arishi küm 28 tain asayar shibai taküm Wimbledon kokogo, la 6-2, 6-3 agi minute 64buba nung Alexandrova-i koka liasü.
Asaya nung Halep-i taoba mapang asayaba ama masayatet aser jenjang 38buba nung alila Alexandrova-i ayong ayonga kokogo.
Taoba hopta-a la Wuhan Open nung teberem nung timtem aliba ajanga masayatettsüsa aküm.
Kasa asayamung nungsa Canada tsür Bianca Andreescu-i mezüngbuba round nung takok ngua tanabuba round tongtetogo.
Arishi küm 19 tain asayar yagi 6-2, 2-6, 6-1 agi Belarus tsür Aliaksandra Sasnovich madak takok ngua liasü. Iba asaya nung Bianca-i unforced errors 31 tashi menaa liasü.
World number 6, shibai US Open final nung Serena Williams koka liasü, la iba asayamung nung shilem magi tsüngda asaya 13 atonga koker liasü.
Taoba mapang asayaba ama kanga junga asayateta Sasnovich den mezüngbuba set asaya lai ayong ayonga akok.
Ajisüaka tanabuba set nung Andreescu-i serve junga moteti tim atema. Lai double fault trok mena aser la yimya mazüoktettsüsa jenjang ka atong.
Süngjemshir decider asaya nung lai maneni junga asaya tenzük aser Andreescu indang mezüngbuba serve break asüba sülen la indang serve break mesüdaktsüi 3-0 agi la tejakdang aküm aser maneni kanga junga asayayonga tur lai asaya ayong ayonga akok.
Bianca tanabuba round nung Belgium tsür Elise Mertens den asayatsü.