Simona Halep Italian Open final-i iogo

May 20, 2017 (Agencies): Romania tsür Simona Halep-i Honibarnü Dutch tsür Kiki Bertens madak 7-5 6-1 agi koka Italian Open final-i iogo.
Halep ya WTA ranking nung jenjang 6 buba nung lir aser taoba hopta Madrid open-a lai koka liasü. Lai iba asayamong anaben atonga kokogo. La French Open champion Spain tsür Garbine Muguruza mesüra Ukraine tsür Elina Svitolina den Deobranü final asayatsü.
Iba takok ya Halep atema Clay nung asaya 12 buba takok alitsü. Lai semifinal asaya ghonda kaser minute 17 nung koka liasü. Aonung sangwaa tzünglu aruba ajanga asaya ghonda tesadang ka menur ang tenzüktet.
“Iba asaya akokba atema ni kanga pelar. Tzünglu aruba ajanga asaya metembangtettsü ta bilem saka asaya kanga junga asayatetogo aser final asayatsü asoshi kanga pelar,” ta Halep-i ashi.
“Ni kü sasa dak kanga temolung lema bilemer aser Madrid nung takok anguba ajanga court nung tashi ita asayateter. Ni kanga jangratema bilemer aser yamai dang asayaner aser iba title-a kokner,” ta laisa ashi.
Bopanna, Sania tsükogo
Bopanna aser pa partner Pablo Cuevas na 4buba jenjang nung aliba Pierre-Hugues Herbert aser Nicolas Mahut na den quarterfinals asaya nung 6-7(5) 7-6(2) 10-12 agi mekoki asayamong nungi toguogo.
Kasa mapang nung WTA asaya nung Sania Mirza aser Yaroslava Shvedova nati 3-6 6-7(7) agi tanabuba jenjang nung aliba Yung-Jan Chan aser Martina Hingis na makok.