Sindhu final-i iogo; Sameer tamakok angu

BWF World Tour Finals 

Guangzhou, Luchii/December 15 (Agencies): India tsür rongnungi nüngtugu badminton asayar P V Sindhu-i tang tasayadak World Tour Finals nung maneni kanga junga asayaa tang agi küm anabuba final-i iogo, ajisüaka tebur kija asaya nung Sameer Verma tsükogo.
Taoba küm tanabuba jenjang nung tembangla arishi küm 23 tain Sindhu-i semifinal asaya nung Thailand tsür Ratchanok Intanon 21-16 25-23 agi koka final nung asayatsü asoshi maongka ngutetogo. Tena tsüngda minute 54 asayaa liasü.
Kasa mapang tebur kija asaya nung Sameer 21-12 20-22 17-21 agi All England Champion aser World Championship silver medallist China nunger asayar Shi Yuqi-i tsükdaktsüogo.
Sindhu final nung Japan tsür Nozomi Okuhara den asayatsü, shibai la taoba küm World Championship final nung tsükdakja liasü.
“Ni point 2-3 agi la jakdang liasü saka game tatemlen la tejakdang aküm aser ni tilateri abelen aika menaa liasü. Ni nervous süa liasü saka ni aremzüka asaya aser point ajak asoshi meranga asaya aser tatem nung takok nguogo,’ ta Sindhu-i ashi.
“Ni tajungba kümogo ta ni amanger. Ni tang tashitaitba kümogo kechiyong taoba mapang nungbo ni point agütsüba sülen iba indang kanga bilema liasü.”
“Final asaya kanga talangka ka asayatsü. La den asayatsü temela masütsü kechiyong künapronglai pei asaya yimya meteta lir aser final asayanü dang asaya yimya melenshir asayatsü nüngdaker. Kü tsüngda mapang talanglang asayar anungji aremzüka asayatsü nüngdaker,” ta laisa ashi.
World No 6 Sindhu-i küm ana tsüngda tongtibang asayamung final aika nung tamakok nguogo aser item rongnung Rio Olympics, 2017, 2018 World Championships aser Jakarta Asian Games densema lir.
“Ni silver medal aika koktetogo ta meteta lir, saka kecha pressure mali. Ni taoba asaya pezü koda asayaogo yamaji dang asayatsü aser ni final asaya koktetra aji kü asoshi kanga tongtibang asütsü,” ta Sindhu-i ashi.