Sindhu-i Denmark Open nung shilem agitsü renemshir

Odense, October 17 (Agencies): Tan Mongolbar nü nungi tenzüka asayatsü ayongba Denmark Open Superseries Premier badminton asayamong nung takok ngua shilem agitsü asoshi India’er Olympic silver medal agizükla, PV Sindhu-i terenemshiba agia lir.
Sindhu-i Rio de Janeiro nung takok ngua shilem agiba sülen ita 1 ser tasadang ka shi shilem magi aruba sülen tan asayamong nung shilem agitsü renema lir.
Tan asayamong nung 6 buba jenjang abentsü jenjang ngua alila, Sindhu-i lar mezüngbuba asaya China tsür, He Bingjiao den tan Bodbar nü asayatsü.
Lai takok ngua shilem agira, lai lar taruba asayatem Thailand tsür, Ratchanok Intanon; Korea tsür, Sung Ji Hyun aser Chinese Taipei tsür, Tai Tzu Ying nunger den asayatsü lemzüktsü akok.
Tebur singles shilem nunga taoba Deobar nü tembangba Dutch Open Grand Prix asayamong final nung tsüksang, arishi küm 29 tain Ajay Jayaram-i par mezüngbuba asaya Thailand nunger Boonsak Ponsana den asayatsü lemzükogo.
Rio Olympics quarterfinalist, K Srikanth tetsüng yirua aliba yong pai tan asayamong nung shilem magitettsü saka Sai Praneeth, H S Prannoy aser P Kashyap nungeri tan asayamong nung shilem agitsü renema lir.