Sindhu-i World Super Series Finals nung shilem agitsü

Dubai, November 29 (Agencies): India’er tetsür badminton asayar mongin, PV Sindhu-i qualifying asayamong 2 tashi nung takok ngua shilem agiba sülen teshimtet asayartem atema küm tatemlen ayongba World Super Series Finals nung shilem agitsü temeten nguogo.
Sindhu-i tan mezüngsüa temeten anguba sülen lai Dubai nung taruba December ita 14-18 nü tashi toktepa asayatsü renema lir.
Küm tepiyong ayonga asayaba World Super Series asayamong balala nung takok ngua shilem agir singles asayar 8 aser doubles asayar 8-i dang Super Series Finals nung shilem agitsü temeten angur.
Iba tongti asayamong nung shilem magitettsüsa Sindhu-i Destination Dubai Rankings nung 16 buba jenjang ngua liasü saka lai tawa China Open asayamong takok marok agizükba sülen points 11,000 tashi ajangzüka, Super Series Finals nung shilem agitsü temetenji angu.
Arishi küm 21 tain Sindhu-i külem sensotsür, Saina Nehwal; Japan tsür, Sayako Sato o Minatsu Mitani na aser Thailand tsür, Porntip Buranaprasertsuk nunger den temaba jenjang ngua, Finals nung asayatsü jenjangji ajangzük.
Sindhu jakdang Spain tsür, Carolina Marin; Chinese Taipei tsür, Tai Tzu Ying; Japan tsür, Akane Yamaguchi; China tsür Sun Yu aser He Bingjiao na; Thailand tsür, Ratchanok Intanon aser South Korea tsür, Sung Ji Hyun nungeri Super Series Finals nung shilem agitsü temeten ngua lir.