Sindhu, Sakshi, Dipa aser Jitu nunger nem Khel Ratna sempet agütsü

New Delhi, August 29, 2016: Hombarnü Rashtrapati Bhavan nung Tir, Pranab Mukherjee-i Badminton asayar, P.V Sindhu, melangteper Sakshi Malik, shooter, Jitu Rai aser Gymnastics asayar, Dipa Karmakar nunger nem Rajiv Gandhi Khel Ratna Award agutsüba noksa angur.

New Delhi, August 29 (Agencies): Hombarnü India nunger saisapong balala asayartem- PV Sindhu, Sakshi Malik, Dipa Karmakar aser Jitu Rai nunger nem Rajiv Gandhi Khel Ratna Award agütsüogo.
Tanü Rashtrapati Bhawan nung sentong balaka ayongzüka agidang India Tir, Pranab Mukherjee-i parnok nem sempet agütsü.
National Sports Awards nung taküm mezüng atema asayar pezü nem Khel Ratna sempet agütsütsü shimogo.
2009 nung nisung asem- tsüngteper Vijender Singh aser M C Mary Kom na den melangteper Sushil Kumar nunger nem iba sempet külemi agüja liasü.
Tawa asayaba Rio Olympics nung India tsür PV Sindhu-i otsü tasen ka yanglutet aser ibaji Olympics nung India nunger badminton asayar kati mezüngbuba ‘silver medal’ anguba liasü. Ano külen, Sakshi Malik-ia India tetsür melangtepertem rongnung mezüngbuba medal anguba indang otsü yanglua liasü.
Taküm Olympics nung Dipa Karmakar-ibo medal mengutet saka lai gymnastics nung ‘Produnova’ act ta ajaba yimya kanga junga shilem agitetba atema nisungtemi la nem tenüngsang agütsü.
Injang kahshishir Jitu Rai-i tesüiba küm ana tsüngda linük atema medal aika bener arutsüogo. Pai Asian aser Commonwealth Games nung gold aser World Championships nung silver medal ngua liasü.
Taküm asoshi Ministry-isa Arjuna Award atema saisaponger 15 tashi shimogo. Parnok rongnung boxer Shiva Thapa, long distance runner Lalita Babar, cricketer Ajinkya Rahane, hockey players- VR Raghunath aser Rani Rampal nunger dena lir.
Taküm asoshi Dronacharya Award ji coach 6 nem agütsür aser parnok rongnung tongtipangtiba anaji- Dipa’er coach Bishweshwar Nandi aser India Test team captain Virat Kohli’er coach Raj Kumar Sharma na lir.
Tanüngba Dhronacharya Award angurtemji Nagapuri Ramesh (athletics), Sagar Mal Dhayal (boxing), Pradeep Kumar (swimming, lifetime) aser Mahabir Singh (wrestling, lifetime) nungertem lir.
Anosa, Satti Geetha (athletics), Sylvanus Dung Dung (hockey) aser Rajendra Pralhad Shelke (rowing) nunger nem Dhyan Chand Lifetime Achievement Award agütsü.
Asayar kati küm pezü tsüngda saisapongba nung tenüng tajung bener aruba aser takok anguba nung ajemdaker kümshia Khel Ratna Award agütsür. Khel Ratna angur nem medal ka aser kulikaket den sen lakh 7.5 senpet agütsür.
Arjuna Award jia küm pezü tsüngda asayar kati shilem agiba repranger agütsür aser Dronacharya Award ji international sports asayamungtem nung asayartem medal ngutettsüsa sayurtem ajiteta agütsür.
Arjuna, Dronacharya aser Dhyan Chand angur nem nüngo, kulikaket aser sen lakh 5 senpettem agütsür.
Taküm asoshi Rajiv Gandhi Khel Ratna Award aser Arjuna Awards selection committee ji Justice SK Agarwal, Retired Delhi High Court Judge lenisüba kübok liasü.
Dronacharya Awards aser Dhyan Chand Awards atema selection committee ji MC Mary Kom lenisüba nung aser Rajiv Yadav, Secretary (Sports) lenisüba kübok Rashtriya Khel Protsahan Puruskar selection panel-i mapa inyak.