Sindhu World Badminton Championships quarterfinal-i iogo

Jakarta, August 13 (Agencies): India’er tetsür badminton asayar mongin, PV Sindhu-i London Olympics champion, China tsür Li Xureui madak takok ngua tang tasayadak world badminton championships tetsür singles shilem indang quarterfinal asayatsü jenjang tanü Brehostibar nü nguogo.
Tan asayamong nung 11 buba jenjang abenla, Sindhu-i tanü minute 50 nung points 21-17, 14-21, 21-17 ngua Li tsükdaktsü.
Tanü tashi nung world championship bronze 2 tashi agizüka alila, Sindhu-i lar quarterfinal asaya nung takok ngura, lai Spain tsür Carolina Marin mesüra China tsür Wang Shixian na rong nung ka den semifinal asayatsü lemzüktsü.
India tsürsa, Saina Nehwal-ia tanü minute 46 nung points 21-18, 21-14 ngua Japan tsür Sayaka Takahashi madak tasembuba round asaya koka quarterfinal-i aiba osang jangjaogo.
Tan asayamong nung 2 buba jenjang abenla, Saina-i China tsür Wang Yihan den quarterfinal nung ajuruteptsü akok.
Ano külen, tetsür doubles shilem nung India tsür ana, Jwala Gutta aser Ashwini Ponappa natia takok ngua quarterfinal nung shilem agitsü jenjang nguogo.
Tan asayamong nung 13 buba jenjang nung alir, Jwala o Ashwini nati points 21-15, 18-21, 21-19 ngua Japan tsür Reika Kakiiwa aser Miyuki Maeda na madak takok angu.